საქართველოს სახალხო დამცველთან არსებულმა ტოლერანტობის ცენტრმა ტოლერანტობის საერთაშორისო დღისადმი მიძღვნილ ღონისძიებას უმასპინძლა. ღონისძიება გახსნეს საქართველოს სახალხო დამცველის მოვალეობის შემსრულებელმა ტატა ხუნწარიამ და საქართველოში გაეროს განვითარების პროგრამის (UNDP) მუდმივი წარმომადგენლის მოადგილემ ინიტა პაულოვიჩამ.
სახალხო დამცველთან არსებული ტოლერანტობის ცენტრის ხელმძღვანელმა ბექა მინდიაშვილმა მიმოიხილა 2012 წლის განმავლობაში საქართველოში ტოლერანტობის სფეროში არსებული მიღწევები და პრობლემები.
ხუნწარიამ და პაულოვიჩამ დააჯილდოეს ჟურნალისტური კონკურსის "ტოლერანტობა და მრავალფეროვნება" გამარჯვებულები. პირველი ადგილის მფლობელი გახდა ლელა დუმბაძე (გაზეთი "ბათუმელები") - სტატია "რატომ იცვლიან ადამიანები რწმენას"; მეორე ადგილი წილად ხვდა ლევან სუთიძეს ("ტაბულა") - სტატია "ნეტარ იყვნენ მოწამენი", ხოლო მესამე ადგილის მფლობელი გახდა სალომე აჩბა (ვებგვერდი: religiebi.info) - სტატია "აკრძალვის მიუხედავად საჯარო სკოლებში სამლოცველოები ისევ არსებობს". ტოლერანტობის ცენტრმა სპეციალური პრიზი გადასცა ჟურნალისტ დავით თინიკაშვილს სტატიების ციკლისთვის რელიგიური გაერთიანებების სოციალური მსახურების შესახებ ("ლიბერალი"). ასევე კონკურსში მონაწილეობისთვის სიგელები გადაეცათ ჯიმშერ რეხვიაშვილს ("რადიო თავისუფლება"), სალომე უგულავას (ჟურნალი "ტაბულა"), ნინო მაჭარაშვილს (ჟურნალი "ტაბულა"), მედეა გოქსაძეს (გაზეთი Комсомольская Правда), მანონი ბოკუჩავას (ქვემო ქართლის საინფორმაციო ცენტრი kkpress.ge).
სახალხო დამცველთან არსებულმა ეროვნულ უმცირესობათა და რელიგიათა საბჭოებმა ტრადიციულად დააჯილდოვეს "ტოლერანტობის ქომაგები" - ის პიროვნებები, ორგანიზაციები და მედიასაშუალებები, რომლებმაც საქართველოში ტოლერანტობის კულტურის განვითარებაში განსაკუთრებული წვლილი შეიტანეს.
ღონისძიებას, რომელიც სახალხო დამცველთან არსებული ტოლერანტობის ცენტრის ორგანიზებითა და გაეროს განვითარების პროგრამის (UNDP) ხელშეწყობით გაიმართა, ესწრებოდნენ პარლამენტის, მთავრობის, დიპლომატიური მისიების, საერთაშორისო და არასამთავრობო ორგანიზაციების და რელიგიათა და ეთნიკურ უმცირესობათა საბჭოების წარმომადგენლები.
ტოლერანტობის საერთაშორისო დღე ყოველწლიურად აღინიშნება, როგორც კულტურებსა და ცივილიზაციებს შორის პატივისცემის, დიალოგისა და თანამშრომლობის აუცილებლობის შეხსენება. ტოლერანტობის დღის აღნიშვნა 1996 წელს გაეროს გენერალური ასამბლეის ინიციატივით დაიწყო. 1995 წლის 16 ნოემბერს იუნესკომ ტოლერანტობის პრინციპების შესახებ დეკლარაცია მიიღო.