სოფლის მეურნეობის განვითარების 1-მილიარდიანი ფონდი მხოლოდ საბიუჯეტო სახსრებით არ შეივსება. სოფლის მეურნეობის მინისტრის დავით კირვალიძის განმარტებით, ფონდის შევსება მოხდება ინვესტორებისა და სხვადასხვა დონორის მიერ გამოყოფილი თანხებით. იმავდროულად, ფონდში საბიუჯეტო თანხების აკუმულირებაც მოხდება.
მინისტრის განმარტებით, ფონდის სტრუქტურასთან დაკავშირებით საბოლოო გადაწყვეტილება მიღებული არ არის, თუმცა, წინასწარი ინფორმაციით, ის სოფლის მეურნეობის სამინისტროს "ფრთებქვეშ" არ იქმნება.
კირვალიძე ამბობს, რომ ფონდი დამოუკიდებელი სტრუქტურული ერთეული იქნება და მის მმართველთა საბჭოში შევლენ პრემიერ-მინისტრი, ფინანსთა მინისტრი, ეკონომიკის მინისტრი, სოფლის მეურნეობის მინისტრი და, სავარაუდოდ, გარემოს დაცვის მინისტრი.
სოფლის მეურნეობის სამინისტროში უკვე ფუნქციონირებს "სოფლის განვითარების ფონდი". როგორც კირვალიძე განმარტავს, ამ ორ ფონდს შორის ქმედებების დუბლირება არ მოხდება, თუმცა, საჭიროების შემთხვევაში, შესაძლოა, სოფლის მეურნეობის სამინისტროს დაქვემდებარებული ფონდის რეორგანიზაციის საკითხიც დადგეს.
