ახალი მთავრობა ციტრუსის ექსპორტზე დამატებითი ბარიერების მოხსნისთვის ზრუნვას იწყებს. როგორც ცნობილია, ქართული ციტრუსის უკრაინაში ექსპორტისას სეზონზე ფიქსირებული ტარიფები მოქმედებდა, რაც ექსპორტირებული ციტრუსის ფასს არ შეესაბამებოდა.
სოფლის მეურნეობის მინისტრის, დავით კირვალიძის განმარტებით, მისთვის აღნიშნული პრობლემის შესახებ უკვე ცნობილია, მან შესაბამისი ზომები უკვე მიიღო, უკრაინის საბაჟო სამსახურის უფროსს წერილი მისწერა და ტარიფების გადახედვა სთხოვა.
"დღეს გავუგზავნეთ წერილი უკრაინის საბაჟო სამსახურის უფროსს თხოვნით, რათა ტარიფებს გადახედონ და მოიყვანონ შესაბამისობაში. რა დგას ამის უკან, ვერ გეტყვით, ესაა სხვა ქვეყნების ინტერესი, რომ მათ ფასს გაუტოლდეს ქართული მანდარინის ფასი თუ სხვა მიზეზებია, არ ვიცი", - განმარტავს მინისტრი.
