სოფლის მეურნეობის განვითარებისთვის ქვეყანაში, ახალი მრავალმილიონიანი პროგრამის განხორციელება იწყება. როგორც დღეს გამართულ ბრიფინგზე, სოფლის მეურნეობის მინისტრმა დავით კირვალიძემ განაცხადა, შვეიცარიის განვითარებისა და თანამშრომლობის სააგენტო და დანიის სამეზობლო პროგრამა, საქართველოს სოფლის მეურნეობის სამინისტროსთან ერთად, სამცხე-ჯავახეთსა და ქვემო ქართლში სოფლის მეურნეობისა და ეკონომიკის განვითარების მხარდამჭერი პროგრამის განხორციელებას იწყებენ.
როგორც დავით კირვალიძემ განმარტა, პროექტის ბიუჯეტი 11 მლნ დოლარია, რომელიც 4 წლის განმავლობაში ამ ორ რეგიონში კარტოფილისა და რძის პროდუქტების სექტორის განვითარებას მოხმარდება.
მინისტრის განმარტებით, აღნიშნული თანხა ფერმერებს 2 სახით მიეწოდებათ: კერძოდ საუბარია სხვადასხვა პროექტების თანადაფინანსებაზე და ასევე „იაფი კრედიტის" გაცემაზე, რომელიც მსგავსი სახის სესხებთან შედარებით საკმაოდ იაფი სესხი იქნება.
„პროგრამა განხორციელდება საქართველოს სოფლის მეურნეობის სამინისტროს და დანიისა და შვეიცარიის მთავრობების ძალისხმევით, დანიის სამეზობლო პროგრამის და შვეიცარიის განვითარებისა და თანამშრომლობის სააგენტოს სამხრეთ კავკასიაში ეკონომიკური განვითარებისა და დასაქმების ხელშეწყობის პროგრამის ფარგლებში. პროგრამის მიზანია ხელი შეუწყოს ეკონომიკურ ზრდას და სიღარიბის შემცირებას სამცხე-ჯავახეთსა და ქვემო ქართლის რეგიონებში. პროექტი ხელს შეუწყობს კარტოფილისა და რძის პროდუქტების წარმოებაში ჩართული ფერმერების, მეწარმეების და მომსახურების მიმწოდებელთა შესაძლებლობის გაძლიერებას, მათი პროდუქტიულობის და კონკურენტუნარიანობის ამაღლებას"- განმარტავს დავით კირვალიძე.
სოფლის მეურნეობის მინისტრი განმარტავს, რომ პროგრამის ფარგლებში „იაფი სეხის" გაცემა კომერციული ბანკების მეშვეობით მოხდება.
სამხრეთ კავკასიაში შვეიცარიის განვითარებისა და თანამშრომლობის სააგენტოს რეგიონური დირექტორი რუდოლფ შოხი განმარტავს, რომ პროგრამის განხორციელება ქვეყნის ეკონომიკური განვითარებისთვის მნიშვნელოვანი წინაპირობა იქნება. შოხის თქმით, დღეს საქართველოში სოფლის მეურნეობის სფერო არის ყველაზე განუვითარებელი, ეს იმ ფონზე, როდესაც საქართველოს სოფლის მეურნეობის დარგის განვითარებისთვის უდიდესი პოტენციალი გააჩნია.
„პროექტის ბიუჯეტი არის 11 მლნ დოლარი, საიდანაც 8 მლნ დოლარი დანიის სამეფოს დაფინანსებაა, რომელიც 2008 წლის დონორთა კონფერენციაზე მიღებული დახმარების ნაწილია. სოფლის მოსახლეობა თანაზიარი უნდა იყოს განვითარებისა და სოფლად მცხოვრები უნდა იყვნენ ამ განვითარების ბენეფიციარები. ამიტომ ჩვენ ფოკუსირებას ვაკეთებთ სოფლად მცხოვრებზე. საქართველოში სოფლის მეურნეობის განვითარებას აქვს დიდი პოტენციალი. ჩვენ ხელს შევუწყობთ ქვეყანაში სოფლის მეურნეობის პროდუქტების განვითარებას. რძეზე დღეს დიდი მოთხოვნაა და ასევე მზარდი მოთხოვნაა კარტოფილზეც. ჩვენ ვიმუშავებთ კომპანიებთანაც, რათა ქვეყანაში რძის პროდუქტების წარმოება გაიზარდოს. ვიმუშავებთ სერვისების მიმწოდებლებთან, რათა უკეთესი სერვისები იქნეს მიწოდებული", - განმარტავს რუდოლფ შოხი.