"რუსეთის ფედერაციამ "აღიარა" აფხაზეთის დამოუკიდებლობა , ხოლო ნიკარაგუამ და ვენესუელამ "სცნო" აფხაზეთის დამოუკიდებლობა. რაშია სხვაობა?", _ დასვა კითხვა დღეს გამართულ პრესკონფერენციაზე პარტია "ევროპელი დემოკრატების" ლიდერმა პაატა დავითაიამ.
მისივე თქმით, ბოლო პერიოდში ხდება განცხადებების გაკეთება და საზოგადოებრივი აზრს შემზადება, თითქოს, რაღაც ქმედებები იწყება კონფლიქტის ზონებთან დაკავშირებით.
"საუბარია სახელმწიფო მინისტრის განცხადებებზე პასპორტებთან, რკინიგზის გახნასთან დაკავშირებით.
მინდა ხაზი გაუსვა, რომ როდესაც ვთქვი, რომ განიხილება პასპორტების აღიარების საკითხი, ბატონმა პაატა ზაქარეიშვილმა თქვა, რომ აღიარება მას არ უთქვამს და საუბარი არის პასპორტების ცნობასთან დაკავშირებით და მათ გათანაბრებას საქართველოს მოქალაქის პირადობის მოწმობასთან.
რაშია განსხვავება ცნობასა და აღიარებას შორის?! - რუსეთის ფედერაციამ აღიარა აფხაზეთის დამოუკიდებლობა , ხოლო ნიკარაგუამ და ვენესუელამ სცნო აფხაზეთის დამოუკიდებლობა",_ განაცხადა დავითაიამ და აღნიშნა - " ნურავის ავიწყდება, რომ სწორედ ტერმინებთან დაკავშირებით მიმდინარეობს ომი 1992 წლის შემდეგ ყოველ სიტყვაზე, რომელიც შეეხება აფხაზეთს.
"როგორ შეიძლება საუბარი იმაზე, რომ აფხაზეთის, რომელიც თავს განიხილავს დამოუკიდებელ სახელმწიფოდ და ე.წ. სამხრეთ ოსეთის, რომელიც სწორედ ასეთადვე განიხილავს თავს, მათი პირადობის მოწმობები იქნება ეს თუ სხვა რამ ვცნოთ?! იქ არის ერთი საბუთი - პასპორტი ,რომელსაც აწერია "აბხაზსკაია რესპუბლიკა" და "იუჟნოოსეტინსკაია რესპუბლიკა" მეტი საბუთი იქ არ არსებობს გარდა რუსეთის მოქალაქეობისა. როგორ შეიძლება ამ საბუთის სამართლებრივ ჩარჩოებში ჩასმა საქართველოს კანონმდებლობით ცალმხრივად, მათი თანხმობის გარეშე?! მათი თანხმობა ამასთან დაკავშირებით არასოდეს არ იქნება . რაში სჭირდებათ ასეთი აბსურდული ინიციატივების გამოხატვა რომელიც არასოდეს არ იმუშავებს?! რაში სჭირდებათ ამ თემატიკის საერთოდ შემოტანა?! ამ დილით ე.წ. სამხრეთ ოსეთის ე.წ. პარლამენტის წევრებმა დასცინეს ამასთან დაკავშირებით და თქვეს, რომ ეს არის პიარნაბიჯები. ასევე ანქვაბმა თქვა, რომ არანაირი რკინიგზა არ გაიხსნება", _ აცხადებს დავითაია.
