"ლიბერთი ბანკის" გენერალურმა დირექტორმა დღევანდელ პრესკონფერენციაზე ბანკის სამწლიანი მუშაობის შედეგები შეაჯამა. მისივე ინფორმაციით, ბანკის დამფუძნებლებმა სააქციო კაპიტალში 17,8 მილიონი ლარის ინვესტიცია განახორციელეს და ამ დროისათვის სააქციო კაპიტალის მოცულობა 95,6 მილიონს შეადგენს.
"2009 წლის სექტემბერში ბანკის მთლიანი აქტივები 278 მლნ ლარს შეადგენდა, 2012 წლის სექტემბერში კი - 900 მლნ ლარს, რაც იმას ნიშნავს, რომ სამი წლის მანძილზე ბანკის ზომა გასამმაგდა. განხორციელებული ინვესტიციებისა და სწორი მენეჯმენტის ხარჯზე ჩვენ ბევრად უფრო სწრაფად გავიზარდეთ, ვიდრე მთლიანობაში საბანკო სექტორი. 2009 წლის სექტემბერში ბანკის საბაზრო წილი მთლიანი აქტივების მიხედით იყო 3.5%, ახლა კი 6.6%-ს აღემატება", - განაცხადა გუგენიძემ და აღნიშნა, რომ კიდევ უფრო შთამბეჭდავია საკრედიტო პორტფელის დინამიკა - 2009 წლის სექტემბერში ბანკის სესხები 94 მლნ ლარს შეადგენდა, 2012 წლის სექტემბერში კი - 455 მლნ ლარს, ანუ 4.8-ჯერ არის გაზრდილი. სექტემბრის მონაცემებით კი ბანკს 400 000-ზე მეტი მსესხებელი ჰყავს.
გურგენიძის ინფორმაციით, 2009 წლის სექტემბრისთვის 94 მლნ ლარის სასესხო პორტფელზე ფორმირებული იყო სულ 23 მლნ ლარის რეზერვი.
"2008 წლიდან მოყოლებული, ბანკი იყო ფაქტობრივად გადახდისუუნარო და მხოლოდ რეგულატორის ძალისხმევითა და ჩვენ მიერ განხორციელებული ინვესტიციებისა და სწორი მართვის ხარჯზე გადარჩა და განვითარდა", - აღნიშნა გურგენიძემ და აქვე აღნიშნა, რომ იმ სესხებში, რაც მემკვიდრეობით ერგოთ ბევრი "საინტერესო" სესხი იყო. საუბარია ფინანსური პრობლემების მქონე კომპანიებზე გაცემულ 2.5 მლნ ლარის სესხზე, რომლის, როგორც გურგენიძემ აღნიშნა, მთლიანად ჩამოწერა გახდა საჭირო; ასევე არასტაბილური ფინანსური მდგომარეობის მქონე სამრეწველო ჯგუფზე გაცემული 9,9 მლნ ლარის სესხები, არაადეკვატური დოკუმენტაციით, რომელზეც ბანკის ჯამურმა ზარალმა 5.6 მლნ ლარი შეადგინა კიდევ ერთ ფინანსურად არამდგრად ჯგუფზე გაცემული 10.5 მლნ ლარის სესხები, ყოვლად არაადეკვატური უზრუნველყოფით, რომელზეც ბანკის ჯამურმა ზარალმა 10.5 მლნ ლარი შეადგინა.
"საკრედიტო პოლიტიკის გარდა აღსანიშნავია 2005-2008 წლებში ბანკის მიერ განხორციელებული რამდენიმე "საინტერესო" ინვესტიცია, რომლის შედეგად ბანკს დამატებით 8.1 მლნ ლარის ხარჯი და ზარალი მიადგა", - განაცხადა გურგენიძემ.
მისივე ინფორმაციით, 2009 წლის სექტემბერში ბანკში დეპოზიტებმა 201 მლნ ლარი შეადგინა, 2012 წლის სექტემბერში კი 645 მლნ ლარი - თითქმის 3.5-ჯერ მეტი.
"დეპოზიტების მიხედვით ბანკის საბაზრო წილი 2009 სექტემბერში იყო 5.5%, ახლა კი 8.2%-ია იურიდიული პირების დეპოზიტები 2009 სექტემბერში 59 მლნ ლარს შეადგენდა, 2012 წლის სექტემბრის მდგომარეობით, 381 მლნ ლარის ოდენობის იურიდიული პირების დეპოზიტებით "ლიბერთი ბანკი" სიდიდით მესამე ბანკია საქართველოში", - განაცხადა გურგენიძემ.
მისივე განმარტებით, 2009 წელს ბანკს ფაქტობრივად არ გააჩნდა იპოთეკური სესხის პროდუქტი, დღეს კი ლარში გასცემს 10-15-წლიან იპოთეკებს.
"2009 წელს ბანს არ გააჩნდა თანამედროვე საკრედიტო ბარათი, დღეს კი მეჯიქ ქარდს 10 000 ადამიანზე მეტი იყენებს. ფაქტობრივად, არ გააჩნდა მიკროდაკრედიტება, დღეს კი მიკრო და აგრო დაკრედიტების კუთხით 22 მლნ ლარზე მეტი არის დაბანდებული. ფაქტობრივად, არ ახორციელებდა სამომხმარებლო დაკრედიტებას, დღეს კი ამ მიმართულებით 16.7 მლნ ლარის საკრედიტო რესურსია დაბანდებული და ბანკის მრავალფეროვანი სამომხმარებლო საკრედიტო პროდუქტებით, მათ შორის ონლაინ განვადებით 17 000-ზე მეტმა ადამიანმა ისარგებლა. არ გააჩნდა თანამედროვე მიმდინარე ანგარიში და ინტერნეტბანკინგი, დღეს კი მულტისავალუტო "ლიბერთი" ანგარიშით, რომელზეც 10-მდე სხვადასხვა ვალუტაში ქვეანგარიშის მიბმაა შესაძლებელი, და პაკეტში მრავალრიცხოვანი სხვა მომსახურება შედის, მათ შორის ინტერნეტბანკი, სმს ბანკინგი, და ა.შ. რომლითაც 200 000-ზე მეტი ადამიანი სარგებლობს. არ გააჩნდა შემნახველი ანაბარი, დღეს კი შემნახველი ანაბარი "პატრიოტით" 23 000-ზე მეტი ადამიანი სარგებლობს. გააჩნდა ვადიანი ანაბრების საკმაოდ მწირი არჩევანი და სულ 23 000 ანაბარი ჰქონდა, დღეს კი ბანკის განახლებული, ინოვაციური ვადიანი ანაბრებით 55 000-ზე მეტ ანაბარს ემსახურება. ბოლო ერთი წლის მანძილზე 387 იღბლიანი მეანაბრე ჯამში 535 000 ლარით დაჯილდოვდა. მხოლოდ 500 000 პენსიისა და შემწეობის მიმღებს გააჩნდა სადებეტო ბარათი და შეეძლო ბანკის 135 ბანკომატით სარგებლობა, დღეს კი უკლებლივ ყველა, 1.1 მლნ პენსიებისა და შემწეობების მიმღებს გააჩნია სადებეტო ბარათი და პინ-კოდის აღების შემთხვევაში, შეუძლია ბანკის 270 ბანკომატით სარგებლობა. შეუძლებელი იყო კომუნალური გადახდების გადახდა ბანკის საკომისიოს გარეშე. 2010 წლის სექტემბრიდან დღემდე ბანკის 25 სერვისცენტრში უფასოდ 130 მლნ ლარზე მეტი ჯამური თანხის 7.8 მილიონი კომუნალური გადასახადი განხორციელდა", - აღნიშნა ლადო გურგენიძემ.
მისივე განმარტებით, დღეს კი ბანკს ემიტირებული აქვს 260 000-ზე მეტი PAY საგადახდო სისტემის სმარტივი ბარათი.
"აქედან 40 000-ზე მეტი მომხმარებელი სარგებლობს კალათების მოქნილი სისტემით. ათი ათასობით მომხმარებელმა ისარგებლა და სარგებლობს smartivi.ge ვებგვერდით და სმარტივის მობილური აპლიკაციით iPhone-ისა და Android-ის სისტემის სმარტფონებისთვის. ემსახურება 100 000-მდე Money ელექტრონული საფულის მომხმარებელსა და წამყვანი საერთაშორისო ელექტრონული საფულეების ათი ათასობით ქართველ მომხმარებელს. ელექტრონული კომერციის მომსახურებას უწევს PAY სისტემაში ჩართულ 370-ზე მეტ მერჩანტს, დანერგილია შეძენილი ნივთის სახლში მიტანის სერვისი. გააჩნია P2P მოქნილი, თანამედროვე მრავალარხიანი სისტემა, რომლითაც ორ ადამიანს შორის მყისიერი გადარიცხვა შესაძლებელია არა მხოლოდ სერვისცენტრებსა და ბანკომატებში, არამედ სმს შეტყობინებისა და Facebook-ის მეშვეობით. სატესტო რეჟიმში მუშაობს საქართველოში პირველი Facebookმაღაზია, სადაც თავისი პროდუქტებისა თუ მომსახურების შეთავაზება ნებისმიერ პირს შეუძლია.
1-ლი ნოემბრიდან სატესტო რეჟიმში გაეშვება PAY საგადახდო სისტემის მობილური აპლიკაცია. ბანკი ვერ ემსახურებოდა სოფლად მცხოვრებ მოსახლეობას, გარდა პრიმიტიული გზით პენსიების დარიგებისა. დღეს კი, თანამედროვე საბანკო მომსახურების პრაქტიკულად სრულ სპექტრს სთავაზობს 116 "ლიბერთი ექსპრეს" მობილური სერვის ცენტრისა და 40-ზე მეტი სოფლად გახსნილი PAYExpress მინი-სერვის ცენტრის სახით", - განაცხადა ლადო გურგენიძემ და აღნიშნა, რომ ამ ყველაფერთან ერთად 2009 წლის შემდეგ 48 სერვის ცენტრის რეაბილიტაციასა და 135 ახალი ბანკომატის დადგმაზე 45 მლნ ლარი დაიხარჯა.