"გალში ინციდენტების პრევენციისა და მათზე რეაგირების სამუშაო ჯგუფის შეხვედრა ქართული მხარის ბრალეულობით არ ჩაშლილა",_ განცხადება ამის შესახებ საქართველოს საგარეო საქმეთა მინისტრის მოადგილემ ნინო კალანდაძემ გააკეთა გავრცელებული ინფორმაციის კომენტირებისას იმის შესახებ, რომ 27 ივნისს გალში უნდა გამართულიყო ინციდენტების პრევენციისა და მათზე რეაგირების მექანიზმის ფარგლებში შეხვედრა, მაგრამ ქართულმა მხარემ მონაწილეობაზე უარი განაცხადა.
"შეხვედრა ბოლომდე დაგეგმილი არ ყოფილა და მხოლოდ საუბრის დონეზე განიხილებოდა მისი ჩატარება. რაც შეეხება რეალურ მიზეზს, იცით, რომ რუსეთის ხელისუფლებამ მიზანმიმართულად შეუწყო ხელი ამ შეხვედრის ჩაშლას და ეს გაკეთდა აფხაზეთში მათი შესაბამისი წარმომადგენლების მხრიდან",_ განაცხადა კალანდაძემ და აღნიშნა, რომ ქართული მხარე გალის შეხვედრების განახლების იმედს კვლავაც იტოვებს.
"ჩვენ ამ მექანიზმის შენარჩუნების სურვილი გვაქვს, წინააღმდეგობა რუსეთის ფედერაციის მხრიდან წამოვიდა და ჩვენ ვიმედოვნებთ, რომ შევძლებთ განახლებას",_ განაცხადა ნინო კალანდაძემ.
