საპარლამენტო უმრავლესობის წევრი აკაკი ბობოხიძე მიიჩნევს, რომ პარლამენტის სხდომა მინიმუმ იმ დროზე მაინც უნდა იწყებოდეს, რა დროსაც ახლა იწყება.
როგორც მან ბუნებისა და გარემოს დაცვის კომიტეტის დღევანდელ სხდომაზე ახალი რეგლამენტის პროექტის განხილვისას აღნიშნა, თავის დროზე პარლამენტის სამუშაო დღის დასაწყისად 10-ის ნაცვლად 11 საათი იმის გამო განისაზღვრა, რომ აკაკი ასათიანს ადრე ადგომა ეზარებოდა.
საპროცედურო საკითხთა და წერსების კომიტეტის თავმჯდომარის პირველი მოადგილის დავით თოდრაძის არგუმენტით, 11:00 საათზე დეპუტატები თბილისიდან ქუთაისში ჩასვლას ვერ მოასწრებენ.
„მიმაჩნია, რომ პარლამენტის სხდომა მინიმუმ იმ დროზე მაინც უნდა იწყებოდეს, რა დროსაც ახლა იწყება. ყველას გასაგონად ვინც ფიქრობს, რომ დრო განმსაზღვრელი შეიძლება იყოს, ვამბობ - ზუსტად იმდენი დრო სჭირდება ქუთაისიდან თბილისში ჩასვლას, რამდენიც თბილისიდან ქუთაისში. მანძილი ზუსტად ერთნაირია. ამ შემთხვევაში პრობლემას დამოკიდებულება იწვევს. ისეთი სურათი იქმნება თითქოს, ვერ ვაცნობიერებთ, რომ პარლამენტის ძირითადი სამუშაო ადგილი ქუთაისი იქნება?" - აღნიშნა დეპუტატმა.
თოდრაძის განმარტებით, დილის საათებში გადაწეული დრო შესვენების ხარჯზე ანაზრაურდება, რადგან პროექტის თანახმად, კანონმდებლები 2-დან 4 საათამდე კი არა 3-დან 4-მდე შეისვენებენ.
ბობოხიძეს არც ეს ინიციატივა მიაჩნია მისაღებად.
„თუ მომავალი რეგლამენტი ითვალისწინებს იმას, რომ სასესიო და საკომიტეტო სხდომები ერთ კვირას ჩატარდება. ბუნებრივია, რომ ხშირად კომიტეტებს სხდომების ჩატარება შესვენებების დროს მოგვიწევს და ერთი საათი საკმარისი ვერ იქნება", - აღნიშნა დეპუტატმა. რეგლამენტის პროექტის თანახმად, მომავალ პარლამენტში პლენარული სხდომები 11:00 საათის ნაცვლად, 12:00-ზე დაიწყება.