ხაშურში მინის ტარის მწარმოებელი ქარხნის მშენებლობა იწყება. ქარხანას ქართულ-აზერბაიჯანული კომპანია Inter Glass Georgia აშენებს, სადაც 40-პროცენტიან წილს შპს "საქართველოს გაზის ტრანსპორტირების კომპანია" ფლობს, ხოლო 60% -ს აზერბაიჯანული კომპანია Inter Glass Azerbaijan-ი. კომპანია Inter Glass Azerbaijan-ი აზერბაიჯანში ამ მიმართულებით უკვე 4 წელია მუშაობს.
პროექტის საინვესტიციო ღირებულება 30 მლნ ლარს შეადგენს. საწარმოში 200 ადგილობრივი მოქალაქე დასაქმდება.
კომპანია წარმოებაში ადგილობრივ ნედლეულს (80 პროცენტი) გამოიყენებს. ხაშურის მინის ტარის ქარხანა წელიწადში 100 მლნ მინის ტარას გამოუშვებს. წარმოებული პროდუქციით საქართველოს ალკოჰოლიანი და უალკოჰოლო სასმელების, ასევე საკონსერვო საწარმოები მომარაგდება. დაგეგმილია ექსპორტიც. კომპანიის გათვლებით, უახლოეს პერიოდში ქვეყნის საექსპორტო პოტენციალი 10 მლნ ლარით გაიზრდება.
ქარხნის მშენებლობა 18 თვეში დასრულდება. ქარხანაში თანამედროვე ტექნოლოგიები დამონტაჟდება, რაც მენეჯმენტს საფუძველს მისცემს ხარისხიანი პროდუქცია აწარმოოს და იმპორტირებულ ნაწარმს კონკურნცია გაუწიოს.
