პარლამენტში პრეზიდენტის ანგარიშის შემდეგ დებატებში გამომსვლელთა რიგითობას ბიუროზე კამათი მოჰყვა. ბიუროს სხდომაზე რეგლამენტით განსაზღვრული რიგითობა ფრაქცია „ერთობა სამართლიანობისათვის" თავმჯდომარემ დიმიტრი ლორთქიფანიძემ გააპროტესტა და აღნიშნა, რომ დამოუკიდებელ ფრაქციას, რომელიც საპარლამენტო უმცირესობასა და უმრავლესობას გარეთ არის დარჩენილი, გამოსვლებში პირველი ადგილი უნდა დაერთმოს.
„პარლამენტში იყო ტრადიცია, როდესაც დებატებს ყოველთვის დამოუკიდებელი დეპუტატები ხსნიდნენ, ახლა კი არსებობს დამოუკიდებელი ფრაქცია", - აღნიშნა ლორთქიფანიძემ, რაზეც მას საპროცედურო საკითხთა კომიტეტის თავმჯდომარემ ხათუნა გოგორიშვილმა სთხოვა განემარტა, თუ რას ნიშნავს დამოუკიდებელი ფრაქცია.
ამასთან, ლორთქიფანიძე პარლამენტის პირველმა ვიცე-სპიკერმა მიხეილ მაჭავარიანმა დადანაშულა, რომ მას პარლამენტის შეცდომაში შეყავს.
„თქვენ ან შეგნებულად არ კითხულობთ რეგლამენტს, ან მიზანმიმართულად გინდათ, რომ დაგვარღვევიოთ რეგლამენტი. დამოუკიდებელი დეპუტატები ამჟამად პარლამენტში 4 ლეიბორისტი და ხურციძეა. ფრაქცია კი ყველა ჩვეულებრივია და ჩემთვის ჯონდი ბაღათურიას და პეტრე მამრაძის ფრაქცია ერთმანეთისგან არ განსხვავდება. ვერ გავიგე ახალ თქვენ რა გინდათ, რომ სხდომა დამოუკიდებელმა დეპუტატებმა ანუ შალვა ნათელაშვილმა გახსნას?", - მიმართა მაჭავარიანმა ლორთქიფანიძეს, რაზეც „ქრისტიან-დემოკრატმა" ვიცე-სპიკერმა ლევან ვეფხვბაძემ აღნიშნა, რომ მაჭავარინისგან ასეთ შედარებას არ ელოდა.
ფრაქციათა შორის რიგითობის დაცვასთან დაკავშირებით „ქრისტიან-დემოკრატების" თავმჯდომარემ გიორგი ახვლედიანმა განაცხადა, რომ იგი თანახმაა ფრაქცია „ერთობა სამართლიანობისათვის" შემდეგ გამოვიდეს სიტყვით, რასაც უმრავლესობის წვრები აპლოდისმენტებით შეხვდნენ.
ამასთან, იურიდიულ საკითხთა კომიტეტის თავმჯდომარემ პავლე კუბლაშვილმა ახვლედიანს ურჩია, რომ მათი კუთვნილი დროც დაეთმოთ ლორთქიფანიძის ფრაქციისთვის.
როგორც ცნობილია, ხვალ, 20:00 საათზე პარლამენტში პრეზიდენტი მიხეილ სააკაშვილი წლიური ანგარიშით წარსდგება, რომლის შემდეგაც პოლიტიკური დებატები გაიმართება.
რეგლამენტის 138-ე მუხლის მეორე ნაწილის თანამხად, პოლიტიკურ დებატებში გამოსვლებისათვის უმრავლესობასა და უმცირესობას ეძლევა თითოეულს 45 წუთი, ფრაქციასა და პარლამენტის თავმჯდომარეს (სხდომის თავმჯდომარეს) - თითოეულს 15 წუთი, პარლამენტის თავმჯდომარის მოადგილეს - 10 წუთი, პარლამენტის წევრს, რომელიც არ არის გაერთიანებული არც ერთ ფრაქციაში, - 5 წუთი. ფრაქცია, უმრავლესობა და უმცირესობა მათთვის გამოყოფილი დროის ფარგლებში განსაზღვრავენ გამომსვლელთა რაოდენობასა და მათზე დროის გადანაწილების სქემას. პოლიტიკურ დებატებში გამომსვლელთათვის გამოყოფილი დროის გაზრდა დაუშვებელია.
