დღეს, 10 თებერვალს, 1:00 სთ-ზე ამერიკის საერთაშორისო განვითარების სააგენტოს (USAID) მისიის დირექტორი სტივენ ჰეიკინი დაესწრება USAID-ის ჯანდაცვის გაუმჯობესების (HCI) პროექტის გახსნას, სადაც ასევე მოწვეულები არიან საქართველოს პირველ ლედი სანდრა რულოვსი, ჯანდაცვის მინისტრი ანდრია ურუშაძე და სხვა საპატიო სტუმრები. ორწლიანი პროექტი მიზნად ისახავს საქართველოში სამედიცინო მომსახურების ხარისხის, თანმიმდევრულობისა და უწყვეტობის გაუმჯობესებას. ამისთვის იგეგმება ექიმთა ცოდნისა და უნარ-ჩვევების გაუმჯობესება, მტკიცებითი მედიცინის მონაცემების გამოყენების გაზრდა და თანამედროვე მეცნიერულად დასაბუთებული მკურნალობის მეთოდებისადმი წვდომის გაადვილება.
პროექტი გაზრდის სამედიცინო მომსახურების ხარისხს იმერეთის რეგიონში, როგორც ამბულატორიულ, ისე სტაციონარულ სამედიცინო დაწესებულებებში მომუშავე ექიმების ცოდნისა და კლინიკური უნარ-ჩვევების გაუმჯობესების მეშვეობით. პროექტი ასევე ითვალისწინებს ღონისძიებებს მთელი ქვეყნის მასშტაბით, სახელდობრ ინტერვენციებს ჯანდაცვის სექტორის მარეგულირებელი გარემოს რაციონალიზაციისა და მეცნიერულად დასაბუთებული სამედიცინო ინფორმაციის წვდომისა და გამოყენების გაუმჯობესების კუთხით.
პროექტი გეგმავს ამერიკის შეერთებულ შტატებში მოღვაწე ქართველი ექიმების ცოდნისა და უნარ-ჩვევების შეძლებისდაგვარად ფართო გამოყენებას საქართველოში სამედიცინო მომსახურების სისტემის გაძლიერებისა და ქართულ-ამერიკულ სამედიცინო საზოგადოებას შორის ურთიერთობის გაღრმავების მიზნით.
HCI პროექტს, როგორც USAID-ის ჯანდაცვის გაუმჯობესების გლობალური პროექტის ნაწილს, ახორციელებს University Research Co., LLC. ეს პროექტი შესაბამისობაშია საქართველოს ჯანმრთელობის დაცვის 2011-2015წწ სახელმწიფო სტრატეგიის: „ხელმისაწვდომი და ხარისხიანი ჯანდაცვის" ამოცანებთან.
მასალის გამოყენების პირობები