მცხეთის მუნიციპალიტეტის გამგეობის ინიციატივით 31 დეკემბერს ქალაქ მცხეთაში საახალწლო კონცერტი გაიმართება, სადაც მონაწილეობას მიიღებენ ქართული ესტრადის მომღერლები. გალა -კონცერტი, საახალწლოდ მორთულ, მცხეთის ცენტრალურ მოედანზე 22.00 საათზე დაიწყება და მთელი ღამის განმავლობაში გაგრძელდება.
საახალწლო ღონისძიებები ქალაქ მცხეთაში 3, 4 და 5 იანვარსაც გაიმართება, სადაც ბავშვების წინაშე, საკუთარი შემოქმედებით წარსდეგბიან მცხეთის მუნიციპალიტეტის შემოქმედებითი კოლექტივები და ქუთაისიდან სპეციალურად მოწვეული ნიღბების თეატრის მსახიობები.
მსგავსი ღონისძიებებია დაგეგმილი მცხეთა-მთიანეთის რეგიონის სხვა მუნიციპალიტეტებშიც:
დაბა თიანეთში საახალწლო კონცერტი 31 დეკემბერს 18.00 საათზე დაიწყება და აქაც, ადგილობრივი შემსრულებლები, ქართული ესტრადის წარმომადგენლებთან ერთად თიანეთის მოსახლეობას ულამაზეს სანახაობას ჰპირდებიან.
დუშეთში საახალწლო ღონისძიებები 29 დეკემბერს, კულტურის სახლში 16.00 საათზე დაიწყება, სადაც მონაწილეობას ადგილობრივი ანსამბლები მიიღებენ, ხოლო 31 დეკემბერს, სადღესასწაულო ზეიმის დაწყება, დუშეთის ცენტრალურ მოედანზე, ღია ცის ქვეშ 20 საათზეა დაგეგმილი.
ყაზბეგის მუნიციპალიტეტში საახალწლო ზეიმი დაბა სტეფანწმინდის ცენტრალურ მოედანზე 23.00 საათზე დაიწყება, ხოლო ახალი წლის დადგომისას, ულამაზესი ფეირვერკების მოწყობა იგეგმება.
