GPRS-სისტემის საკონტროლო სალარო აპარატების შეძენა დასვენების დღეებშიცაა შესაძლებელი. შემოსავლების სამსახურის გადაწყვეტილებით, სერვისცენტრები მთელი საქართველოს მასშტაბით, შაბათ-კვირასაც იმუშავებენ, თუმცა ამ დღეებში მხოლოდ სალარო აპარატების გაცემა იქნება შესაძლებელი.
ძველი სალარო აპარატები ახალი, GPRS-სისტემის საკონტროლო სალარო აპარატებით 2011 წლის 31 დეკემბრამდე უნდა ჩანაცვლდეს. შემოსავლების სამსახურის ინფორმაციით, უკვე დარეგისტრირებულია 60 000 GPRS სალარო აპარატი.
ახალი მოდელის საკონტროლო სალარო აპარატების დარიგება აგვისტოდან დაიწყო. საგადასახადო კოდექსში შესული ცვლილებების შედეგად, გადამხდელთა ერთი ნაწილი საერთოდ თავისუფლდება სალარო აპარატის ქონის ვალდებულებისგან. საქმე ეხება მიკრობიზნესის სტატუსის მქონე გადამხდელებს. მეწარმეთა დიდ ნაწილს კი შემოსავლების სამსახურის გადაწყვეტილებით, ახალი აპარატები უსასყიდლოდგადაეცემა. GPRS-სალარო აპარატები უფასოდ დაურიგდება მცირე ბიზნესის სტატუსის მქონე გადამხდელებს.
GPRS-სისტემის საკონტროლო სალარო აპარატის ღირებულება 290 ლარია. ნებისმიერ გადამხდელს შეუძლია ისარგებლოს ბანკის განვადებით და შეიძინოს სალარო აპარატი. განვადება უპროცენტოა და თანხის გადახდა ნაწილდება 12 თვეზე.
