ქუთაისში კოპიტნარის აეროპორტის რეაბილიტაცია-რეკონსტრუქციის პროექტის მართვის ჯგუფმა სამუშაო შეხვედრა გაიმართა. ეკონომიკისა და მდგრადი განვითარების სამინისტროს ინფორმაციით, შეხვედრა ახლადგახსნილ მთავრობის სახლში ჩატარდა და მასში მონაწილეობა მიიღო მინისტრმა ვერა ქობალიამ. მართვის ჯგუფის შეხვედრა პირველად ჩატარდა და მისი მიზანი იყო კოპიტნარის აეროპორტის რეკონსტრუქცია-რეაბილიტაციის მხრივ არსებული მდგომარეობის გაცნობა, პროექტის განხორციელების კოორდინაციის გაწევა და შესაბამისი ღონისძიებების გატარება. კონკრეტულად, შეხვედრის მონაწილეებმა იმსჯელეს იმ ინფრასტრუქტურული სამუშაოების შესახებ, რომელიც მომდევნო რამდენიმე თვეში განხორცილედება.
ეკონომიკისა და მდგრადი განვითარების მინისტრმა და პროექტის მართვის ჯგუფის წევრებმა ასევე დაათვალიერეს კოპიტნარის აეროპორტში მიმდინარე სარეაბილიტაციო სამუშაოები და პირადად გაეცნენ იქ არსებულ მდგომარეობას. ვერა ქობალიამ მედიისთვის კომენტარი გააკეთა, მისი განცხადებით, მუშაობა 24-საათიან რეჟიმში მიდის, მიმდინარეობს როგორც ასაფრენი ზოლის რეაბილიტაცია, ასევე აეროპორტის ახალი ტერმინალის სამშენებლო სამუშაოები. "ადგილობრივი მოსახლეობა მშენებლობის პროცესში აქტიურადაა ჩაბმული. ეს აეროპორტი მნიშვნელოვანი იქნება როგორც დასაქმების, ისე ტურიზმის და ბიზნესის განვითარების კუთხით" - აღნიშნა ვერა ქობალიამ.
პროექტის მართვის უწყებათაშორისი ჯგუფი საქართველოს მთავრობის 2011 წლის 1 ივლისის განკარგულების საფუძველზე შეიქმნა და მასში შედიან საქართველოს პარლამენტის, მთავრობის კანცელარიის, ეკონომიკისა და მდგრადი განვითარების სამინისტროს, რეგიონული განვითარებისა და ინფრასტრუქტურის სამინისტროს, ფინანსთა სამინისტროს, ენერგეტიკის და ბუნებრივი რესურსების სამინისტროს, შინაგან საქმეთა სამინისტროს, თავდაცვის სამინისტროს, შპს "საქაერონავიგაციის", შპს "საქართველოს რკინიგზის", შპს "საქართველოს აეროპორტების გაერთიანების", სამოქალაქო ავიაციის სააგენტოს, იმერეთში პრეზიდენტის რწმუნებულის ადმინისტრაციის და ქ. ქუთაისის მერიის წარმომადგენლები.
2012 წელს დაგეგმილია ქუთაისის კოპიტნარის საერთაშორისო აეროპორტის რეკონსტრუქციის დასრულება, რომელიც ხელს შეუწყობს საქართველოს ავიაბაზარზე დაბალტარიფიანი ავიაკოპანიების მოზიდვას. ფრენები განხორცილედება როგორც რეგიონის, ასევე ევროპისა და აზიის მიმართულებით. ქუთაისის აეროპორტში ინერგება ახალი სანავიგაციო სისტემები, ასევე მიმდინარეობს ახალი სამეთვალყურეო კოშკურის მშენებლობა.