ხვალ, 15 დეკემბერს, სასტუმრო „ჰოლიდეი ინ თბილისში" კომპანია ჰაიდელბერგცემენტის ახალი პროექტის „Quarry Life Award - ბიომრავალფეროვნების ხელშეწყობა კარიერებზე" პრეზენტაცია გაიმართება. კონკურსი ერთდორულად 17 ქვეყანაში ტარდება და მიზნად კარიერებზე ბიომრავალფეროვნების ხელშეწყობას ისახავს. მონაწილეობის მიღება შეუძლიათ სტუდენტესა და მკვლევარებს, როგორც ინდივიდუალურად, ასევე ჯგუფურად. საპრიზო თანხაა 1 500-დან 30 000 ევრომდე. „Quarry Life Award“ 2 ეტაპს მოიცავს, - იდეის წარდგენა და პროექტის ანგარიში. კონკურსში მონაწილეობის მსურველების რეგისტრაცია სპეციალურად ამ პროექტისთვის შექმნილ ვებ გვერდზე - www.quarrylifeaward.ge მოხდება. საპროექტო წინადადება 2012 წლის 17 თებერვალამდე მიიღება. 5 მარტიდან ეროვნული ჟიურის მიერ შერჩეული 5 კანდიდატი პროექტზე იმუშავებს და საბოლოო მოხსენებით ანგარიშს 28 სექტემბრამდე წარადგენს. 2012 წლის ნოემბერ-დეკემბერში გამარჯვებულები, როგორც ეროვნულ, ასევე გლობალურ დონეზე გამოვლინდებიან. პრესკონფერენციას დაესწრებიან კონკურსის ჟიურის წევრები, - გარემოს დაცვის მინისტრი გოგა ხაჩიძე, ეკოლოგიის ინსტიტუტის დირექტორი პროფესორი დავით თარხნიშვილი, გერმანიის საერთაშორისო თანამშრომლობის საზოგადოების (GIZ) წარმომადგენელი გიორგი ლებანიძე, WWF კაუკასუსის წარმომადგენელი თამაზ გამყრელიძე და ჰაიდელბერგცემენტის გაყიდვებისა და მარკეტინგის დირექტორი აკაკი ჩხაიძე.

შეგახსენებთ, რომ ჰაიდელბერგცემენტი სამშენებლო მასალების წარმოების ერთ-ერთი აღიარებული ლიდერია გლობალურ ბაზარზე და მსოფლიოს მასშტაბით ცემენტისა და ბეტონის მწარმოებელთა სამეულში შედის. კომპანიის კუთვნილ 2500 საწარმოში, რომლებიც მსოფლიოს 40 ქვეყანაში არის განთავსებული, 53 000 თანამშრომელია დასაქმებული.