პრემიერ-მინისტრმა ნიკა გილაურმა, მთავრობის სხდომაზე, ყველა მინისტრს მომდევნო 2-3 კვირის განმავლობაში, 2012 წლის პრიორიტეტებზე, მცირე პრეზენტაციების გაკეთება დაავალა.
პრემიერის თქმით, საზოგადოებამ უნდა იცოდეს რის გაკეთებას აპირებს საქართველოს მთავრობა 2012 წელს. ნიკა გილაურმა მთავრობის სხდომაზე 2012 წლის ბიუჯეტის შესახებაც ისაუბრა, რომელიც გასულ კვირას დამტკიცდა პარლამენტში.
"ბევრი ვიმუშავეთ მთავრობის წევრებთან, პრეზიდენტის ოფისთან და პარლამენტთან ბიუჯეტის შესახებ. ეს ბიუჯეტი არის საკმაოდ დაბალანსებული და ერთ-ერთი ყველაზე ჯანსაღი, ჯამურად ნაერთი ბიუჯეტი 8,5 მილიარდამდეა, რაც 10-11-ჯერ მეტია ვიდრე 2003 წლის ბიუჯეტი. სახელმწიფო ბიუჯეტი არის 7 მილიარდ 940 მილიონი ლარი" - განაცხადა გილაურმა.
მისი განმარტებით ბიუჯეტის დეფიციტი განსაზღვრულია 3,5 პროცენტით, რაც ერთ-ერთი დაბალი მაჩვენებელია რეგიონში.
"მისასალმებელია, რომ ეს მაჩვენებელი ყოველწლიურად მცირდება. ჩვენი მიზანია 2013 წელს დეფიციტი 3 პროცენტზე დაბლა ჩამოვიყვანოთ, რაც ასევე ძალიან ჯანსაღი იქნება ქვეყნის ეკონომიკისთვის" - განაცხადა გილაურმა.
პრემიერის განცხადებით, 2012 წლის ბიუჯეტით გათვალისწინებულია მშპ-ს 5 პროცენტიანი ზრდა. მისი განმარტებით, დანახარჯებში პრიორიტეტად აღებულია სოციალური ხარჯები, ჯანდაცვა, განათლება და სოფლის მეურნეობა.
"ამ სამი მიმართულების დაფინანსება არის გაზრდილი. საგრძნობლად არის გაზრდილი განათლების დაფინანსება, ჯანდაცვისა და სოციალური მიმართულების დაფინანსება. მე აქ ვგულისხმობ საპენსიო პაკეტის ზრდას, ასევე იმას, რომ მომავალი წლის 1-ელი სექტემბრიდან დარიგდება სადაზღვევო ვაუჩერები. ამ ვაუჩერებს მიიღებს აბსოლუტურად ყველა პენსიონერი და 5 წლამდე ბავშვები. ეს სერიოზული გარღვევა იქნება ჯანდაცვის სფეროში" - განაცხადა გილაურმა.
მისივე თქმით, ასევე საგრძნობი ზრდა არის ინფრასტრუქტურულ პროექტებზე. 1 მილიარდამდე ლარი არის გათვალისწინებული წყლის, ენერგეტიკისა და საგზაო პროექტებზე.
