კოალიციამ "სამართლიანობისთვის" ინიციატივით დღეს 30-მა არასამთავრობო ორგანიზაციამ ცხინვალის რეგიონში მიმდინარე ე.წ. საპრეზიდენტო არჩევნებთან განცხადება გააკეთა. არასამთავრობო ორგანიზაციები აღნიშნული არჩევნების გამო შეშფოთებას გამოთქვამენ და მას უკანონოდ მიიჩნევენ.
"ჩვენ, საქართველოს სამოქალაქო საზოგადოების წარმომადგენლები შეშფოთებას გამოვთქვამთ ცხინვალის რეგიონში ე.წ. საპრეზიდენტო არჩევნების ჩატარებასთან დაკავშირებით და მივიჩნევთ, რომ აღნიშნული არჩევნები უკანონოა, ხოლო მის შედეგებს არ ძალუძს, არსებითი ცვლილებები შეიტანოს ლეგიტიმურ პოლიტიკურ სივრცეში როგორც ადგილობრივ, ისე საერთაშორისო დონეზე. ვაცხადებთ, რომ სანამ ცხინვალის რეგიონიდან ეთნიკური წმენდის შედეგად გამოდევნილ ათასობით ადამიანს არ მიეცემა შესაძლებლობა, დაუბრუნდეს საკუთარ სახლ-კარს და მონაწილეობა მიიღოს რეგიონის სოციალურ-ეკონომიკურ და პოლიტიკურ ცხოვრებაში, ნებისმიერი პროცესი, მათ შორის არჩევნები, მოკლებული იქნება კანონიერ საფუძვლებს და ვერ განსაზღვრავს ცხინვალის რეგიონისა და მისი მოსახლეობის მომავალს", - აღნიშნულია განცხადებაში.
არასამთავრობო ორგანიზაციები იმედოვნებენ, რომ საერთაშორისო საზოგადოება ადეკვატურ შეფასებას მისცემს ცხინვალის რეგიონში დაგეგმილ ე.წ. საპრეზიდენტო არჩევნებს, როგორც კრიმინალური რეჟიმის მიერ ეთნიკური წმენდის შედეგების ლეგიტიმაციის კიდევ ერთ მცდელობას და არ ცნობს ე.წ. არჩევნების შედეგებს.
