ქართულმა კომპანია "American Monolith"-მა ფოთში უახლესი ტექნიკით აღჭურვილი სასაწყობე მაცივარი ააშენა, რომლის საზიემო გახსნაც 28 ოქტომბერს, 15:00 საათზე გაიმართება.
პროექტი "American Monolith"-მა განახორციელა, რომლის დამფუძნელები არიან "Silk Road" ჯგუფი და ამერიკული კომპანია Southeastern Export Corporation"-ი.Pპროექტი დაფინანსდა ამერიკის სამთავრობო საფინანსო ორგანიზაციის (OPIC)- ის მიერ და პროექტის ბიუჯეტი 11 მლნ. 300 ათასი ლარია. შენობა 6 500 კვადრატული მეტრზეა განლაგებული, სადაც 9 000 სტელაჟირებული პალეტის ადგილია, იგი 10 000 ტონა პროდუქტს იტევს და _23ºC-იდან +3ºC-მდე ინახავს. შენობას აქვს ხუთი უნიკალური სასაწყობე ოთახი, სადაც შესაძლებელია შეინახოს 500-იდან 3 500 პალეტამდე.
საწყობს მართავს°ჩრდილოეთ ამერიკაში ცნობილი პროვაიდერი კომპანია "Everest kool solutions"-ი. საწყობი მთლიანად კომპიუტერიზებულია, ტემპერატურის რეგულირება, სამუშაო დროის მართვის სისტემა და საზიდი მოწყობილობა, კომპიუტერით იმართება, რაც საწყობში საკვები პროდუქტების შეტანის და გატანის უსაფრთხოებას უზრუნველყოფს. საწარმო მომხმარებელს ასევე სთავაზობს საბაჟო მომსახურებას, ვიდეოდაკვირვების სისტემას, რისკის ანალიზს და განსაკუთრებული კონტროლის პოსტებს (HACCP) .
ობიექტის მშენებლობის პროცესში "American Monolith"-ის მიერ დაქირავებული იყო 300-ზე მეტი სპეციალისტი და მისი გახსნის შემდეგ შეიქმნა 30 მუდმივი სამუშაო ადგილი. დასაქმებულია ადგილობრივი მოსახლეობის გარკვეული რაოდენობა რომელთა გამომუშავება გადატვირთული ტონაჟიდან გამომდინარეობს.
ეს პროექტი მნიშვნელოვან გავლენას მოახდენს გაყინული და ტემპერატურა კონტროლირებადი პროდუქტის ლოჯისტიკაზე, რომლის გადატანაც ხდება კავკასიაში და ცენტრალურ აზიაში. გაიზრდება გადაზიდული გაყინული პროდუქტების მოცულობა ფოთის გავლით, რომელიც ადრე შესაძლებელი იყო მხოლოდ ბალტიის პორტების, აღმოსავლეთ ხმელთაშუა ზღვის, სპარსეთის ყურისა და არაბეთის ზღვის პორტების საშუალებით.
უკვე საგრძნობლად მოიმატა ფოთში შემოსული მაცივარ-კონტეინერების რაოდენობამ, რაც სტიმულს აძლევს ჩრდილოეთ და სამხრეთ ამერიკის წამყვან საზღვაო მიმოსვლის კომპანიებს, გამოიყენონ უფრო დიდი გემები ფოთის მიმართულებით, რაც გაფართოებისა და მოდერნიზაციის ახალ შესაძლებლობებს შეუქმნის ფოთის პორტს. ყველაფერი ეს გამოიწვევს ტრანსპორტირების ფასების დაწევას და უფრო მეტად გაზრდის გადაზიდვის მოცულობას.
ამის გათვალისწინებით, კომპანია "American Monolith"-ი უკვე მუშაობს საკონტეინერო ტერმინალის შექმნაზე, რომელიც დაკავშირებული იქნება სამაცივრე კომპლექსთან. ტერმინალი იფუნქციონირებს ახალი წლიდან.
კომპანია "American Monolith"-ი მომავალ წელს გეგმავს ქ.თბილისში #2 სამაცივრე კომპლექსის სრულ რეკონსტრუქციას და მოდერნიზებას. წლის ბოლოსათვის იგეგმება დამატებითი დაფინანსება თბილისის პროექტისათვის, რომელიც უნდა დამტკიცდეს OPIC-ის მიერ.
საწარმო არა მხოლოდ უახლესი ტექნოლოგიებისა და ონლაინმენეჯმენტის სისტემებით არის აღჭურვილი, არამედ ის ნამდვილი საზოგადოებრივი სამაცივრე საწყობია, რომელიც ხელმისაწვდომია ყველასთვის, ვინც მიოზიდავს წამყვან მომწოდებლებს ფოთში და გადამწყვეტ როლს შეასრულებს ახალი აბრეშუმის გზის გაყვანის საქმეში.