წუხელ, ღამის 2 საათზე, ყვარლის რაიონში საგზაო - სატრანსპორტო შემთხვევა მოხდა. ყვარლის ტბიდან დიდი სისწრაფით მიმავალი „BMW"-ს მარკის მანქანა გზის სავალი ნაწილიდან გადავიდა და ხეს შეეჯახა. შეჯახების შედეგად მანქანაში მყოფი ხუთივე ადამიანი გარდაიცვალა.
„შემთხვევის ადგილზე რომ მივედით, მანქანის ფანჯრიდან მხოლოდ ერთი გოგო იყო გადმოყვანილი. დანარჩენი 4 მგზავრიც უკვე გარდაცვლილი იყო. მანქანა ისეთ მდგომარეობაში დაგვხვდა, რომ შიგ მყოფების გადმოყვანა ვერ ხერხდებოდა. მე ისინიც შევამოწმე, მაგრამ არანაირი სიცოცხლის ნიშანი არ აღენიშნებოდათ. ცხედრების მანქანიდან გადმოტანა მას შემდეგ მოხერხდა, როცა საგანგებო სიტუაციების მართვის სამსახურის თანამშრომლებმა მანქანას სახურავი გადააჭრეს. მიცვალებულები ექსპერტიზის ბიუროს მანქანით სახლებში გადაასვენეს. გოგონები ყვარელში, მამაკაცები კი თბილისსა და ბორჯომში", - განუცხადა კახეთის საინფორმაციო ცენტრს ყვარლის სასწრაფო - სამედიცინო დახმარების ექიმმა თეიმურაზ შაოშვილმა.
მომხდარზე აღძრულია სისხლის სამართლის საქმე. გამოძიებას ყვარლის პოლიცია აწარმოებს.