საპარლამენტო უმრავლესობის შეფასებით, ოკუპირებულ აფხაზეთზე რეალური გავლენა "ეფ-ეს-ბეს" და პუტინს აქვს და არა მათ მიერ ჩამოყალიბებულ ბუტაფორიულ სისტემას. ამის შესახებ უმრავლესობის წევრმა, ევროპასთან ინტეგრაციის კომიტეტის თავმჯდომარემ დავით დარჩიაშვილმა აფხაზეთში ე.წ. რიგგარეშე საპრეზიდენტო არჩევნების შეფასებისას აღნიშნა.
"აქ მთავარი მოთამაშე არის რუსეთი, რომელთან ურთიერთობაც გასარკვევია საერთაშორისო დონეზე და პირდაპირ ურთიერთობებში. დანარჩენი მოთამაშები - შამბა, ანქვაბი თუ სხვები დამოუკიდებელ თამაშს ვერ თამაშობენ", - აღნიშნა დარჩიაშვილმა.
დეპუტატის შეფასებით, ე.წ. კანდიდატებს ქცევასაც სწორედ რუსეთი ფაქტორი განსაზღვრავს და არა პირადი სურვილები და დამოკიდებულება საქართველოს მიმართ.
"რუსეთი როგორც მოიქცევა, ისინიც ამის მიხედვით ლავირებენ. ადრე თუ გვიან ეს ვითარება შეიცვლება, მაგრამ არამგონია ეს ცვლილება დღეს მოხდეს", - მიაჩნია დავით დარჩიაშვილს.
შეგახსენებთ, რომ აფხაზეთის ოკუპირებულ ტერიტორიაზე სეპარატისტული რეჟიმის ე.წ. რიგგარეშე საპრეზიდენტო არჩევნები 26 აგვისტოს გაიმართება, რომლში სამი "კანდიდატი" - ე.წ. პრეზიდენტობის მოვალეობის შემსრულებელი ალექსანდრე ანქვაბი, ე.წ. პრემიერ-მინისტრი სერგეი შემბა და ოპოზიციონერი პოლიტიკოსი რაულ ხაჯიმბა იღებენ მონაწილეობას.
