"დემოკრატიული მოძრაობის" ლიდერი ნინო ბურჯანაძე, მეუღლის, ბადრი ბიწაძისთვის დანიშნულ სახაზინო ადვოკატს პროკურატურის მხარდაჭერაში ადანაშაულებს.
"2011 წლის 20 ივნისს აღმკვეთი ღონისძიების დამძიმების საკითხის განხილვისას, სასამართლო პროცესზე კვლავ გამოცხადდა ე.წ. სახაზინო ადვოკატი, მიუხედავად იმისა, რომ სასამართლოს ესწრებოდა ჩვენ მიერ შერჩეული ადვოკატი ლევან სამუშია. პარადოქსულია, თუმცა ფაქტია, რომ სასამართლო პროცესის მიმდინარეობისას სახაზინო ადვოკატმა ბეროშვილმა მხარი არ დაუჭირა ადვოკატ სამუშიას არც ერთ შუამდგომლობას და მხარდაჭერა გამოუცხადა პროკურატურის პოზიციას. მისი აცილების საკითხის განხილვისას კი, ოჯახის მოთხოვნის მიუხედავად, უარი განაცხადა აცილებაზე და განაგრძო სასამართლო პროცესში მონაწილეობა. სახაზინო ადვოკატი პროცესზე აშკარად გამოდიოდა პროკურატურის მხარდამჭერად. კატეგორიულად ვაცხადებ, რომ სახელმწიფოს მიერ დანიშნული ადვოკატი არ წარმოადგენს ბადრი ბიწაძის ინტერესებს და მის მიერ საგამოძიებო მოქმედებებში მიღებული ყველა მოქმედება არის უკანონო", - აღნიშნულია ბურჯანაძის მიერ გავრცელებულ განცხადებაში.
ბურჯანაძე მიიჩნევს, რომ 2011 წლის 30 მაისს ბადრი ბიწაძეს ბრალი წარედგინა საპროცესო ნორმების უხეში დარღვევით.
"კანონმდებლობის შესაბამისად, ბრალდებულს ან მისი ოჯახის წევრებს, ბრალდებულის გამოუცხადებლობის შემთხვევაში, უფლება აქვთ, გონივრულ ვადაში წარადგინონ მათ მიერ შერჩეული ადვოკატი, რაც დაადასტურა 30 მაისის მიმართვით გამომძიებელმა კ. სირაძემ, რომელმაც ბრალდებულს და მის ოჯახს 48-საათიანი ვადა მისცა ოჯახის მიერ შერჩეული ადოკატის საგამოძიებო ორგანოებში გამოსაცხადებლად. როგორც მოსალოდნელი იყო, სამართალდამცავებმა ვადა თავადვე დაარღვიეს და საპროცესო ნორმების იმპერატიულ მოთხოვნათა უგულებელყოფით, სახელმწიფოს ხარჯზე მოწვეული ადვოკატის მეშვეობით ბრალი წარუდგინეს ბადრი ბიწაძეს, რითაც წაართვეს დაცვის უფლება. აღნიშნულზე არანაირი რეაგირება არ მოუხდენია სახელმწიფოს მიერ მოწვეულ ადვოკატ იმედა ბეროშვილს", - აღნიშნულია განცხადებაში.
ბურჯანაძე მიიჩნევს, რომ „ზემოთ მოყვანილი კურიოზები", ქართული მართლმსაჯულების განუყოფილ ნაწილადაა ქცეული და კიდევ ერთხელ ადასტურებს, რომ საქართველოში არ არსებობს ობიექტური სასამართლო.
"მოსამართლე, მოვალეობის შესრულების ნაცვლად, ძირითადად, იმით იყო დაკავებული, რომ ბადრი ბიწაძის ადგილსამყოფელი გაერკვია. არ არსებობს ობიექტური გამოძიება, სახაზინო ადვოკატის ინსტიტუტი კი მხოლოდ პოლიტიკური შეკვეთის შესრულებისთვის არის გამოყენებული. კიდევ ერთხელ ვადასტურებ სრულ უნდობლობას ქართული მართლმსაჯულების მიმართ, თუმცა ყველა პროცედურას დავასრულებთ, რათა სტრასბურგის სასამართლოში კიდევ ერთხელ აეხადოს ფარდა საქართველოში დღეს ჩამოყალიბებული "მოდერნიზებული დიქტატურის" მართლმსაჯულებას", - იუწყება "დემოკრატიული მოძრაობის" ლიდერი.
