რუსეთის მხრიდან მომდინარე პრობლემების მოგვრებისთვის არსებობს ერთი რეცეპტი - ეს არის რუსეთის იძულება საერთაშორისო თანამეგობრობის მხრიდან, დაიწყოს ნაკისრი ვალდებულების შესრულება. ამის შესახებ პარლამენტის თავმჯდომარემ ონის რაიონში რუსი ოკუპანტების მიერ 10 ქართველის დაკავების ფაქტის შეფასებისას აღნიშნა.
"ერთ-ერთი ჩვენი ამოცანა, რაზედაც ვსაუბრობთ ევროპელ კოლეგებთან და პარტნიორებთან, არის სწორედ საერთაშორისო მონიტორინგის გაძლიერება საოკუპაციო ხაზზე და რუსეთის იძულება - დაიწყოს აღებული ვალდებულებების შესრულება", - აღნიშნა ბაქრაძემ.
მისი თქმით, პირველ რიგში, ამ ვალდებულებში იგულისხმება საქართველოს ტერიტორიიდან საოკუპაციო ჯარის გაყვანა, რომელიც "ცეცხლის შეწყვეტის შესახებ" ხელშეკრულებით არის გათვალისწინებული.
"ამ ეტაპზე უპირველეს ამოცანად შეიძლება ჩაითვალოს საერთაშორისო დამკვირვებლების დაშვება ოკუპირებულ ტერიტორიაზე და ევროკავშირის მისიის გავრცელება საოკუპაციო ხაზის მეორე მხარეს, რაც შემცირებდა ასეთი ტიპის პროვოკაციების ალბათობას", - მიაჩნია მას.
ბაქრაძის თქმით, აღნიშნულ ფაქტთან დაკავშირებით ქართული მხარე საერთაშორისო თანამეგობრობას საქმის კურსში ჩააყენებს და ყველა ბერკეტს გამოყენებს დაკავებულების გასათავისუფლებლად.
