ეკონომიკისა და მდგრადი განვითარების მინისტრი ვერა ქობალია და ფინანსთა მინისტრი კახა ბაინდურაშვილი ზაფხულის ტურისტული სეზონის გახსნის წინ საქართველოს საინვესტიციო სააგენტოს ორგანიზებით საქართველოში მოქმედ წარმატებული სასტუმროების ხელმძღვანელობას შეხვდნენ. შეხვედრას ასევე დაესწრნენ ეროვნული საინვესტიციო სააგენტოსა და ტურიზმის ეროვნული სააგენტოს ხელმძღვანელები.
შეხვედაზე განხილულ იქნა საქართველოში სასტუმროს ბიზნესის განვითარების ახალი შესაძლებლობები, ის პრობლემები, რომელთა წინაშეც დგანან სასტუმროები და ასევე, თუ რა მიმართულებით სჭირდებათ მათ სახელმწიფოს მხრიდან დახმარება.
როგორც ეკონომიკისა და მდგრადი განვითარების მინისტრმა აღნიშნა, მიმდინარე წლის მაისის თვეში საქართველოში ტურისტთა უპრეცედენტოდ მაღალი რაოდენობა ჩამოვიდა, ამიტომ ქვეყანა მზად უნდა იყოს ტურისტთა შემდგომი ნაკადისთვის, კერძოდ, წინასწარი პროგნოზით, წლის ბოლომდე საქართველოში 3 მილიონამდე ტურისტი ჩამოვა, 2015 წლამდე კი ეს ციფრი 5 მილიონამდე გაიზრდება.
ვერა ქობალიას განცხადებით, სასტუმროების ხელმძღვანელებთან შეხვედრის მიზანიც სწორედ ეს იყო - თუ კონკრეტულად როგორ, რა კუთხით უნდა აღმოუჩინოს სახელმწიფომ მხარდაჭერა ამ სექტორში მომუშავე ბიზნესს, რათა ქვეყანა მზად დახვდეს ტურისტთა სულ უფრო მზარდ ნაკადს. "ჩვენ ბიზნესთან ერთად უნდა გადავწყვიტოთ, თუ რისი გაკეთებაა საჭირო ამ მიმართულებით", - აღნიშნა ვერა ქობალიამ.
შეხვედრაზე საუბარი ძირითადად რამდენიმე ასპექტს შეეხო, რომელთაც სასტუმროების მუშაობა უფრო წარმატებული უნდა გახადონ: ინფრასტრუქტურის (მათ შორის სატრანსპორტო კუთხით), IT ტექნოლოგიების და სხვა თანამედროვე კომუნიკაციების უკეთ განვითარება და მათი ერთიანი პროგრამული უზრუნველყოფა. როგორც შეხვედრის შემდგომ მასში მონაწილე ბიზნესმენებმა აღნიშნეს, მათ ხელისუფლების წარმომადგენელთა მხრიდან ყველა დასმულ შეკითხვაზე სრული და ამომწურავი პასუხები მიიღეს.
საქართველო ლიდერობს 124 ქვეყანას შორის ვიზის მისაღებად არსებული მარტივი მოთხოვნების მიხედვით. 2011 წლის პირველ კვარტალში საქართველოში 675,000 ტურისტი ჩამოვიდა, რაც 2010 წლის იგივე პერიოდთან შედარებით 43%-იან ზრდას შეადგენს.
საქართველოს მასშტაბით ამჟამად მოქმედებს 400, მათ შორის ოჯახური ტიპის სასტუმრო, რაც ჯამში დამსვენებლებს 10,000 ოთახს სთავაზობს. საქართველოში ამ ეტაპზე ძირითადი აქცენტი კეთდება სასტუმროს ფასის ხარისხთან შესაბამისობაზე და მატულობს მოთხოვნა 2-4 ვარსკვლავიან სასტუმროებზე, რადგან ეს ნიშა ასათვისებელია. სასტუმროებთან დაკავშირებული ამერიკული კვლევის STR global-ის თანახმად, მაისის თვეში მაღალი კლასის სასტუმროები, რომელთაც 100-ზე მეტი ნომერი აქვთ, სრული მოცულობით იყო დაჯავშნული და რეალურად ადგილი არცერთ სასტუმროში არ იყო.
ტურიზმისა და სასტუმროების ბიზნესის შემდგომი სტიმულირების მიზნით საქართველოს მთავრობამ შექმნა თავისუფალი ტურისტული ზონები, რომლებიც ინვესტორებს სთავაზობს უპრეცედენტო პირობებს, როგორიცაა: მიწისა და სასტუმროს გენერალური გეგმის უსასყიდლოდ გადაცემა, საშემოსავლო და ქონების გადასახადისგან 15 წლით გათავისუფლება. ამასთან, სახელმწიფო უზრუნველყოფს კომუნიკაციების ადგილზე მიყვანას და ინფრასტრუქტურის განვითარებას, როგორიცაა გზები და ანაკლია-ზუგდიდის აეროპორტი.
