15 ივნისს, 19:00 საათზე, თბილისში სასტუმროში Holiday Inn Tbilisi ასოციაცია ქართული ღვინო საექსპორტო ბაზრების განვითარების სამოქმედო გეგმის დოკუმენტის პირველადი ვერსიის დასრულებასთან დაკავშირებით მიღებას გამართავს.
მიღებას, რომელსაც საპატიო სტუმრის სტატუსით საქართველოს პირველი ლედი სანდრა-ელისაბედ რულოვსი დაესწრება, მისასალმებელი სიტყვით ასოციაცია ქართული ღვინის, ჰოლანდიის საგარეო საქმეთა სამინისტროსთან არსებული პროგრამა CBI-ისა და ჰოლანდიის საელჩოს წარმომადგენლები გახსნიან.
მოწვეულ სტუმრებს შორის მთავრობის, დიპლომატიური კორპუსის, საერთაშორისო ორგანიზაციების და ღვინის მწარმოებელი კომპანიების წარმომადგენლები იქნებიან. საღამოზე ასევე მიწვეულები არიან საქართველოს სოფლის მეურნეობის ბაკურ კვეზერელი; საქართველოს ეროვნული ტურიზმის სააგენტოს თავჯდომარე მაია სიდამონიძე; საქართველოს ეროვნული საინვესტიციო სააგენტოს თავჯდომარე ქეთევან ბოჭორიშვილი; საქართველოს ინტელექტუალური საკუთრების ეროვნული ცენტრის „საქპატენტის" თავჯდომარე ირაკლი ღვალაძე; აშშ-ის საელჩოს, აშშ-ის საერთაშორისო განვითარების სააგენტო USAID- ისა და მისი ეკონომიკური აღმავლობის ინიციატივის პროგრამის (EPI) წარმომადგენლები; საქართველოს ბიზნესასოციაცია და სხვა სტუმრები.
გაიმართება ასოციაციაში საპატიო წევრების მიღებისა და მათთვის სიგელების გადაცემის ღონისძიება. შესაძლებელი იქნება ასოციაცია „ქართული ღვინის" წევრი კომპანიების ღვინოების დეგუსტაციაც.
დოკუმენტი მოიცავს ქართული ღვინის სექტორის ზოგად დახასიათებას, პრიორიტეტული საექსპორტო ბაზრების მიმოხილვასა და ზოგადი სტრატეგიის მარკეტინგულ მიმართულებებს, ექსპორტის პროცესებში არსებული წინააღმდეგობების ჩამონათვალსა და მათი გადაჭრის გზებს.
2010 წლის დეკემბრიდან ასოციაცია ქართული ღვინო ჰოლანდიის საგარეო საქმეთა სამინისტროსთან არსებული პროგრამა CBI-ის ხელშეწყობით მუშაობდა ღვინის სექტორის საექსპორტო ბაზრების განვითარების სამოქმედო გეგმაზე. ასოციაციამ მოახდინა ინფორმაციების ფასილიტაცია და და ერთიან დოკუმენტად ჩამოყალიბება. დოკუმენტის შექმნაში მონაწილეობას იღებდნენ შემდეგი მხარეები: საქართველოს სოფლის მეურნეობის სამინისტრო; ვაზისა და ღვინის დეპარტამენტი „სამტრესტი"; საქართველოს ეროვნული საინვესტიციო სააგენტო; საქართველოს ტურიზმის ეროვნული სააგენტო; ასოციაცია ქართული ღვინის წევრი მწარმოებელი კომპანიები.
ასოციაცია „ქართული ღვინო" დაარსდა 2010 წელს. დღეისთვის მასში გაერთიანებულია 24 მწარმოებელი კომპანია. მათ შორისაა საქართველოში არსებული თითქმის ყველა მსხვილი, ასევე საშუალო და პატარა კომპანიები.
აღსანიშნავია, რომ საქართველოს მთლიანი ღვინის ექსპორტის წილის დაახლოებით 70% მოდის ასოციაციის წევრ კომპანიებზე. ასოციაციის მთავარ მიზნებს შორისაა ისეთი თემები, როგორებიცაა საქართველოში მევენახეობის და მეღვინეობის სექტორი განვითარების ხელშეწყობა; ექსპორტის ხელშეწყობა; დარგთან დაკავშირებული მარკეტინგულ და სარეკლამო საქმიანობაში მონაწილეობის მიღება; საერთაშორისო გამოფენებში, კონკურსებში და დეგუსტაციებში მონაწილეობის მიღება, ქართული მეღვინეობის პოპულარიზაციისა და რეკლამის მიზნით; საქართველოში ღვინის დეგუსტაციების, კონკურსების, გამოფენებისა და საერთაშორისო ფესტივალების ჩატარებისათვის საორგანიზაციო საქმიანობაში მონაწილეობა; უცხოური და ადგილობრივი გრანტების, დახმარებებისა და ინვესტიციების მოზიდვა, მეღვინეობის, მევენახეობისა და ღვინის ტურიზმის სფეროში მთლიანი სექტორის განვითარებისათვის.
გარდა ამისა, ასოციაცია „ქართული ღვინო" არის ქვევრის ფონდის ერთ-ერთი დამაარსებელი.
2010-2011 წლებში ასოციაციამ ორგანიზება გაუკეთა ქართული კომპანიების არაერთ საერთაშორისო გამოფენაში მონაწილეობის მიღებას; ასევე იყო WinExpo Georgia 2011-ის თანაორგანიზატორი. ივნისში კი ამერიკული მხარის დახმარებით ორგანიზება გაუკეთა კომპანიების ხელმძღვანელობების საქმიან მოგზაურობას, კონტაქტების დამყარებს, დეგუსტაციისა თუ საქმიანი შეხვედრების გამართვას აშშ-ის რამდენიმე შტატში სამომავლო ურთიერთთანამშრომლობის მიზნით.