უმსხვილესი ჰოლდინგი „საქართველოს ინდუსტრიული ჯგუფი" სახელმწიფოს მიერ აღიარებული პრიორიტეტების გათვალისწინებით, ახალგაზრდებში ტექნიკური განათლების პროპაგანდის კამპანიას იწყებს.
ჰოლდინგის ორგანიზებით ტექნიკურ უნივერსიტეტში პირველი შეხვედრა სამშაბათს გაიმართა, რომელსაც „საქართველოს ინდუსტრიული ჯგუფის" წარმომადგენლები, თეთრიწყაროს რაიონიდან მიწვეული 50-მდე აბიტურიენტი და ტექნიკური უნივერსიტეტის პროფესორები დაესწრნენ.
შეხვედრაზე უნივერსიტეტის სამთო-გეოლოგიისა და ენერგეტიკის ფაკულტეტების დეკანებმა პრეზენტაციები გამართავეს, „საქართველოს ინდუსტრიული ჯგუფმა" კი როგორც ახალგაზრდების პოტენციურმა დამსაქმებელმა, მათ ჰოლდინგის შესახებ დეტალური ინფორმაცია მიაწოდა.
აბიტურიენტებმა ასევე დაათვალიერეს ტექნიკური უნივესტიტეტის სასწავლო ლაბორატორიები.
„საქართველოს ინდუსტრიული ჯგუფის" აღმასრულებელი დირექტორის ზაზა სადუნიშვილის განცხადებით, ამ ტიპის შეხვედრებით აბიტურიენტებს შესაძლებლობა ეძლევათ გაეცნონ ტექნიკურ პროფესიებს, რომ მათი მომავალი პროფესიის არჩევისას სწორი გადაწყვეტილება მიიღონ.
მისი თქმით, აბიტურიენტებთან შეხვედრები გაგრძელდება და პრიორიტეტი მიენიჭება იმ რეგიონებს, სადაც „საქართველოს ინდუსტრიული ჯგუფი" ოპერირებს.
„საქართველოს ინდუსტრიული ჯგუფი" საქართველოში ყველაზე მსხვილი ჰოლდინგია, რომელიც აერთიანებს და მართავს არაერთ კომპანიას: ენერგეტიკის, ბუნებრივი რესურსების მოპოვება-დამუშავების, საშენ მასალათა წარმოების, ლოჯისტიკური მომსახურების, დეველოპმენტის და სხვა სფეროებში.
ჰოლდინგში შემავალი კომპანიები ორიენტირებული არიან ქვეყნის რესურსების ეფექტიან მოპოვება-გამოყენებაზე, რაც ხელს უწყობს საქართველოს ინდუსტრიის გრძელვადიან და წარმატებულ განვითარებას. ჰოლდინგმა უკვე განახორციელა ათობით მილიონის ინვესტირება საქართველოს ეკონომიკაში და კვლავ გეგმავს პერსპექტიული წამოწყებების მხარდაჭერას.
