საპარლამენტო უმრავლესობა "ქრისტიან-დემოკრატებს" ურჩევს, საბაზრო ეკონომიკა და სტალინური, გეგმიური ეკონომიკა ერთმანეთისგან განასხვაონ.
აღნიშნული განცხადება საპარლამენტო უმრავლესობის წევრმა დავით დარჩიაშვილმა დღეს, პლენარულ სხდომაზე "ქრისტიან-დემოკრატების" წევრის ლევან ვეფხვაძის გამოსვლის შეფასებისას გააკეთა.
"გასაგებია, რომ პოლიტიკაში დემაგოგია ერევა, მაგრამ აქ უკვე დემაგოგია აღარ არის. ეს არის საბაზრო ეკონომიკისა და სტალინური, გეგმიური ეკონომიკის ერთმანეთში აღრევა. საბაზრო ფასების ცვლილებების გამო სოფლის მეურნეობის მინისტრის მოხსნის მოთხოვნას სხვა ვერაფერს დავარქმევდი თუ არა წარმოდგენას, რომ ვცხოვრობთ გეგმიური საბჭოთა ეკონომიკის პირობებში", - აღნიშნა დარჩიაშვილმა.
შეგახსენებთ, რომ დღეს, პარლამენტის პლენარულ სხდომაზე ვიცე-სპიკერმა ლევან ვეფხვაძემ პარლამენტს მოუწოდა სოფლის მეურნეობის მინისტრის ბაკურ კევზერელის თანამდებობიდან გადაყენების რეკომენდაციით პრეზიდენტს მიმართონ.
ოპოზიციონერი დეპუტატის თქმით, უმრავლესობის მიერ ერთხელ უკვე გადარჩენილი მინისტრი თავის პირობებს არ ასრულებს და პროდუქტებს ფასი კვლავ ემატება. ამის მაგალითად ვეფხვაძემ ხორცის ფასის გაორმაგება მოიყვანა.