საინვესტიციო პროექტ "შერატონ ბათუმის" წარმატებით განხორციელების შემდეგ შპს "Nurol Georgia"-მ ბათუმის ცენტრში, რუსთაველის ქუჩაზე 9-სართულიანი საცხოვრებელი სახლი ააშენა. როგორც სააგენტო "ჯი-ეიჩ-ენს" საერთაშორისო ინვესტორთა ასოციაციიდან აცნობეს, ამ პროექტში 7 მილიონი დოლარის კაპიტალდაბანდება განხორციელდა და, პირველად რეგიონში, "შერატონის" სტანდარტის შესაბამისი დასრულებული სახლი აშენდა. "მშენებლობის პროცესში ყველა საერთაშორისო მოთხოვნა გათვალისწინებულია. სახლს აქვს ცენტრალური გათბობა, თბოიზოლაცია, ნესტისგან დამცავი საშუალება და, თქვენ წარმოიდგინეთ, კარ-ფანჯარაც კი იგივე ხარისხისა, როგორიც "შერატონ ბათუმში" გამოვიყენეთ. წინასწარი შეფასებით, ერთი კვადრატული ფართის ფასი 2 500-3000 დოლარი იქნება" - აცხადებს, სასტუმრო "შერატონ ბათუმის" მფლობელის წარმომადგენელი ერგინ ულუსოი.