საქართველოს პრეზიდენტს ებრაელი ბიზნესმენების, რონი ფუქსისა და ზეევ ფრენკელის შეწყალება შეწყალების კომისიის გვერდის ავლით, შესაბამისი დებულების მხოლოდ სპეციალური წესის გამოყენებით შეუძლია.
როგორც "ჯი-ეიჩ-ენს" შეწყალების კომისიის თავმჯდომარე ელენე თევდორაძემ განუცხადა, კომისია მხოლოდ იმ მსჯავრდებულთა საქმეებზე მუშაობს, რომლებსაც სასჯელის ნახევარი მაინც მოხდილი აქვთ.
"იქედან გამომდინარე, რომ კომისია მხოლოდ იმ პატიმართა საქმეებს განიხილავს, რომელთან მინიმუმ სასჯელის ნახევარი აქვთ მოხდილი, ებრაელი ბიზნესმენების საქმეზე კომისია გადაწყვეტილებას ვერ მიიღებს და ვერც მათი შეწყალების თხოვნით მიმართავს პრეზიდენტს", - აღნიშნა თევდორაძემ.
დაკავებულთა ადვოკატის, არჩილ კბილაშვილის განმარტებით კი, "შეწყალების გამოყენების წესის" შესახებ დადგენილებით, პრეზიდენტს მსჯავრდებულთა შეწყალება შეწყალების კომისიის გვერდის ავლითაც შეუძლია.
"შეწყალების გამოყენების წესის" შესახებ პრეზიდენტის 2004 წლის 19 ივლისის 217-ე დადგენილება შეწყალების ორდინალურ და არაორდიანულ წესებს მოიცავს. ორდინალური წესის მიხედვით, მსჯავრდებულთა შეწყალება ხდება შეწყალების კომისიის გადაწყვეტილების საფუძველზე, როცა პატიმარს სასჯელის ნახევარი მაინც აქვს მოხდილი, თუმცა არაორდინალური წესი პრეზიდენტს აძლევს უფლებას მსჯავრდებული შეწყალებისთვის საჭირო წინაპირობების გარეშე, ანუ ორდინალური წესის დაცვის გვერდის ავლითაც შეიწყალოს. ებრაელი ბიზნესმენების შეწყალების შემთხვევაში საქართველოს პრეზიდენტს სწორედ არაორდინალური წესის გამოყენება მოუწევს, თუკი, რა თქმა უნდა, ის ბიზნესმენთა შეწყალების გადაწყვეტილებას მიიღებს", - განუცხადა კბილაშვილმა "ჯი-ეიჩ-ენს".
პრეზიდენტის ადმინისტრაციაში ებრაელი ბიზნესმენების, რონი ფუქსისა და ზეევ ფრენკელის შეწყალებასთან დაკავშირებით მათი ოჯახის წევრთა განცხადება 20 აპრილს შევიდა.
შეგახსენებთ, რომ ისრაელის მოქალაქეები ქართველმა სამართალდამცველებმა ბათუმში, გასული წლის 14 ოქტომბერს დააკავეს. მათ მაღალი თანამდებობის პირისთვის ქრთამის შეთავაზება ედებათ ბრალად. რონი ფუქსისა და ზეევ ფრენკელის დაკავება თელ-ავივში სამთავრობო დონეზეა აყვანილი. აღნიშნულის მიუხედავად, თბილისის საქალაქო სასამართლომ ისრაელის მოქალაქეებს რამდენიმე კვირის წინ პატიმრობა შეუფარდა.
სასამართლოს მიერ გაცხადებული ოფიციალური გადაწყვეტილების საფუძველზე, ფუქსს პატიმრობის ვადად 7 წელი, ფრენკელს კი 6 წელი განესაზღვრა. გარდა ამისა, ორივე მსჯავრდებულს ფულადი ჯარიმის გადახდაც მოუწევს - ფრენკელს 100 ათასი ლარის, ფუქსს კი 500 ათასი ლარის ოდენობით.
