ხვალ 8 დეკემბერს, მოსკოვის კინოსახლში საბჭოთა კავშირის სახალხო არტისტ ვიაჩესლავ ტიხონოვთან დამშვიდობების ცერემონიალი გაიმართება. 82 წლის ასაკში გარდაცვლილი მსახიობის საოქალაქო პანაშვიდი მოსკოვის დროით 11:00 საათზე დაიწყება და მასთან გამოთხოვება ყველა მსურველს შეეძლება.
მრავალი სახელმწიფო ჯილდოს მფლობელი, მათ შორის სსრკ-ის სახალხო არტისტი ვიაჩესლავ ტიხონოვი 1928 წლის 8 თებერვალს დაიბადა პავლოვსკი პოსადში, მოსკოვთან. გარკვეული პერიოდი საამქროში მუშაობდა. 1950-60-იან წლებში იქორწინა ნონა მორდიუკოვაზე, რომელიც იმჟამად საბჭოთა კავშირში მასზე გაცილებით პოპულარული მსახიობი იყო.
ტიხონოვის ყველაზე კარგად ცნობილი როლია შტირლიცი იულიან სემიონოვის ნაწარმოების მიხედვით შექმნილ ტელესერიალში "გაზაფხულის ჩვიდმეტი გაელვება" და გავრილ ტროეპოლსკის რომანის ეკრანიზაციაში "შავყურა თეთრი ბიმი".
მას ასევე შესრულებული აქვს ანდრეი ბოლკონსკის როლი ოსკარით დაჯილდოებულ ფილმში "ომი და მშვიდობა" (1969) და მოხუცი კაცის როლი ასევე ოსკარით დაჯილდოებულ ფილმში "მზით გათანგულები" (1994).
