საპარლამენტო ფრაქცია "ქრისტიან-დემოკრატების" წარმომადგენელმა მაგდა ანიკაშვილმა ქართულ ბაზარზე შემოტანილი წამლის ხარისხის გაკონტროლების გამკაცრების თაობაზე საკუთარი ინიციატივა პარლამენტის დღევანდელ პლენარულ სხდომაზეც გააჟღერა.
"ჩვენი ბაზარი არ არის დაცული და თავისუფლადაა შესაძლებელი აქ სხვადასხვა ქვეყნიდან ფალსიფიცირებული მედიკამენტები მოხვდეს. ფარმაცევტულ ბაზარზე დღეს ერთ-ერთ მთავარ პრობლემას წამლის ხარისხი წარმოადგენს. ხელისუფლება ვერ უზრუნველყოფს ბაზარზე მედიკამენტების ხარისხის სათანადო კონტროლს. სახელმწიფო რეგულაცია იმდენად სუსტია, რომ იქმნება დიდი საფრთხე ფარმაცევტულ ბაზარზე ფალსიფიცირებული მედიკამენტების შემოსვლის", - აღნიშნა ანიკაშვილმა.
დეპუტატის თქმით, ფარმაცევტულ ბაზარზე მედიკამენტების ხარისხის კონტროლის გამკაცრების მიზნით ფრაქციამ საკანონმდებლო ინიციატივა შეიმუშავა, რომელიც კანონში "წამლისა და ფარმაცევტული საქმიანობის შესახებ" ცვლილებების შეტანას ითვალისწინებს.
"მივიჩნევთ, რომ განსაკუთრებულ საფრთხეს კანონის მეთერთმეტე მუხლი წარმოადგენს, რომლის არსებული რედაქცია, პირდაპირ უწყობს ხელს ბაზარზე ფალსიფიცირებული მედიკამენტების მოხვედრას. კერძოდ, მოქმედი კანონმდებლობის თანახმად, წამლის იმპორტის დროს შეფუთვა-მარკირების შეცვლის შემთხვევაში თუ რეგულირების სააგენტო ხუთი სამუშაო დღის ვადაში იმპორტიორს ოფიციალურად არ შეატყობინებს უარს მედიკამენტი ბაზარზე ავტომატურად დაიშვება", - განმარტა ოპოზიციონერმა დეპუტატმა.
ამასთან, ანიკაშვილის მოსაზრებით, ხუთი სამუშაო დღე არის დაუშვებლად მცირე ვადა ყველა საჭირო დოკუმენტაციის გადასამოწმებლად. შესაბამისად, რისკი იმისა, რომ ბაზარზე მოხვდება ავტომატური რეგისტრირება შეცვლილი შეფუთვის მქონე მედიკამენტისა ძალიან დიდია.
"ქრისტიან-დემოკრატები მოვითხოვთ გაუქმდეს მედიკამენტების ავტომატური დაშვება ბაზარზე და სააგენტოს მიეცეს დოკუმენტაციის შესწავლის ვადა ერთი თვის განმავლობაში", - აღნიშნა ანიკაშვილმა, რომელაც არ ის გამორიცხა, რომ წამლების ახალი ბაზრებიდან შემოტანა მედიკამენტების ფასებზე უარყოფითადაც აისახება.
აღსანიშნავია, რომ ანიკაშვილის გამოსვლას სხდომაზევე გამოეხმაურა პარლამენტის ვიცე-სპიკერი გიგი წერეთელი და ოპოზიციონერი კოლეგის ეჭვებს უსაფუძვლო უწოდა.
"თქვენ ცდებით. როცა ვლაპარაკობთ წამლის ადვილად შემოტანაზე, ეს პირველ რიგში უკავშირდება ფასების საკითხს, კონკურენციის გაზრდას. ერთ-ერთი მთავარი ამოცანა ჩევნთვის იყო მაღალი ფასები შემცირებულიყო. მცდარია ის მოსაზრებაც, რომ კანონის მიღების შემდეგ მედიკამენტების ხარისხი გაუარესდება, რადგან ლოგიკა სულ სხვას მეტყველებს. თუკი ახალი გზა გაიხსნება, უფრო მეტად ხარისხიანი წამლები შემოვა", - განაცხადა გიგი წერეთელმა.
