მომავალი კვირიდან კომპანიებს საშუალება ექნებათ, საწვავის ხარჯის სახით გაწერის ახალი სამართლებრივი რეგულაციით ისარგებლონ. რომლის თანახმადაც, ეკონომიკურ საქმიანობაში გამოყენებულ ძირითად საშუალებებზე გახარჯული საწვავი ერთობლივი შემოსავლიდან გამოიქვითება.
საწვავის ხარჯის გამოსაქვითად აუცილებელი პირობებია: გადამხდელს უნდა ჰქონდეს საწვავის შეძენის დამადასტურებელი დოკუმენტი _ სპეციალური საგადასახადო ანგარიშფაქტურა; გადამხდელმა უნდა აღრიცხოს საწვავის შესაბამის ძირითად საშუალებაზე გაცემა; საწვავი ჩამოიწერება ფაქტობრივი ხარჯისა და ცალკეული მარკის სატრანსპორტო საშუალებების საწვავის ხარჯის ტექნიკური მახასიათებლების გათვალისწინებით; დასაშვებია დაახლოებით 20%-იანი ცდომილება, რომლის ფარგლებშიც საწვავზე გაწეული ხარჯი და ჩათვლილი დღგ-ის თანხა არ ექვემდებარება გაუქმებას.
ახალ ინიციატივასა და რეგულაციაზე ბიზნესის წარმომადგენლები პრემიერ-მინისტრთან და შემოსავლების სამსახურის უფროსთან ერთად მსჯელობდნენ. ბიზნესი მთავრობის შემოთავაზებით კმაყოფილია. "ვისოლის" სამეთვალყურეო საბჭოს თავმჯდომარის სოსო ფხაკაძის თქმით, ერთ-ერთი მნიშვნელოვანი პრობლემა, რომელიც ბიზნესს აწუხებდა, მთავრობამ დაარეგულირა.
"ეს პრობლემა ძალიან ბევრ ბიზნესკომპანიას აწუხებდა. აქამდე ხდებოდა ასე: ყოველდღე თანამშრომელს უნდა ამოეწერა ოდომეტრის ჩვენება, მომხდარიყო კონტროლი და საგადასახადო ორგანოს მიერ შემოწმება, ოდომეტრების ჩვენების საფუძველზე ხდებოდა. რითაც შემდგომ დგინდებოდა, რამდენად სწორად ხდებოდა საწვავის ხარჯვა. ამიერიდან ოდომეტრების ჩვენების ყოველდღიური ჩაწერა აღარ იქნება საჭირო და ეს თვეში ერთხელ მოხდება. ცდომილების ზღვარი 20 %-ის ფარგლებში იქნება", - აღნიშნა ფხაკაძემ.
პრემიერ-მინისტრი ამბობს, რომ დღემდე საწვავის ჩამოწერის თემა გართულებული იყო.
"ანუ უფრო მარტივად რომ ვთქვა, კომპანია საწვავს იყენებდა თავისი კომერციული საქმიანობისთვის, მაგრამ შემოსავლების სამსახური ხშირ შემთხვევაში, არ ითვალისწინებდა, რომ ეს საწვავი მართლაც კომპანიის კომერციული საქმიანობისთვის იყო გამოყენებული და ამ ხარჯებს კომპანიას ბუღალტრული აღრიცხვისას არ უთვალისწინებდა. ახლა ჩამოწერის პროცესი დაიწყება", - აღნიშნა გილაურმა.
შემოსავლების სამსახურის უფროსის თქმით კი, საწვავის ჩამოწერა გამარტივებული წესით მოხდება.
"ამისათვის არსებობს ორი პირობა: ერთია, რომ საწვავი უნდა იყოს აუცილებლად შეძენილი სპეციალური ანგარიშფაქტურით, რაც აქამდეც ხორციელდებოდა და ბიზნესისთვის დამატებითი ხარჯი არ არის; მეორე - ეს საწვავი უნდა იქნეს გაწერილი იმ ავტოსატრანსპორტო საშუალებაზე, რომელიც უშუალოდ ამ კომპანიის საკუთრებაში, ან მფლობელობაშია. ახალი რეგულაციის თანახმად, თვეში ერთხელ უნდა დაფიქსირდეს ოდომეტრის ჩვენება. ოდომეტრის მიერ ნაჩვენები მანძილი დაანგარიშდება საწვავის რაოდენობაზე და ამას დაემატება კიდევ 20 %-იანი ცდომილება", - აღნიშნა ჯაბა ებანოიძემ.