ქართულ ევრობონდებზე მოთხოვნამ 2 მილიარდ 600 მილიონი დოლარი შეადგინა. ამის შესახებ საფინანსო-საბიუჯეტო კომიტეტის სხდომაზე ფინანსთა მინისტრმა კახა ბაინდურაშვილმა განაცხადა.
მისი თქმით, ახალი ევრობონდების შეძენის სურვილი 19 ქვეყნის 149-მა კომპანიამ გამოთქვა.
"განსაკუთრებული მოთხოვნა ევროპული სახელმწიფოებიდანაა. პირველ სამეულში დიდი ბრიტანეთი, გერმანია და შვეიცარიაა. ქართული ევრობონდების შეძენის სურვილი აშშ-ის კომპანიებმაც გამოთქვეს", - აღნიშნა მინისტრმა.
მისი შეფასებით, ახალი ევრობონდების გამოშვება წარმატებით განხორცილდა, რადგან ადრე თუ საქართველოს ინვესტორები 5 წლით ენდობოდნენ, ახლა ეს ვადა 10 წლამდე გაიზარდა, რაც შემდგომ ქვეყანაში მეტი ინვესტიციის შემოსვლას ნიშნავს.
"ძველი ევრობონდების 85% უკვე დაფარულია, ამაზე მუშაობა ისევ მიმდინარეობს და იგი სრულად დაიფარება. ეს 500 მილიონი დამატებით სესხის აღებასთან არ არის დაკავშირებული, პირიქით, სესხს ამცირებს, რადგან ადრე ვიხდიდით წლიურად 7.5%-ს, ახალი ევრობონდების მომსახურებაზე კი 7,1 %-ს გადავიხდით", - აღნიშნა მინისტრმა და დასძინა, რომ საპროცენტო განაკვეთის შემცირებით შესაბამისად ვალის მომსახურებაც შემცირდა.
მისი თქმით, ახალი ევრობონდების გამოშვებით მთავრობამ 2013 წლისთვის წარმოქმნილი "მცირე სირთულე" მოაგვარა.
"ეს დაკავშირებული იყო იმასთან, რომ 500 მილიონის ერთობლივ გადახდა გვიწევდა 2013 წელს. ახლა ეს სირთულე მოიხსნა, რადგან ახლავე ხდება მათი რეფინანსირება", - აღნიშნა ბაინდურაშვილმა.