მთავრობა "ღვინის ლაბორატორიის" გასხვისებას გეგმავს. აღნიშნულის მიზეზად საქართველოს მთავრობაში, სახელმწიფო და კერძო ლაბორატორიებს შორის არათანაბარ კონკურენტულ გარემოს ასახელებენ. მთავრობაში აცხადებენ, რომ ალკოჰოლური სასმელების ადგილობრივი მწარმოებლები საკუთარი პროდუქციის ტესტირებას იმ ლაბორატორიაში ამჯობინებენ, რომლის ერთ-ერთი მფლობელიც, ამ დარგში პოლიტიკის გამტარებელი "სამტრესტია".
მთავრობაში ხაზგასმით აცხადებენ, რომ მწარმოებლების ასეთი არჩევანი "სამტრესტის" მხრიდან ზეწოლით განპირობებული არ არის. კერძო სექტორის მხრიდან ასეთი არჩევანის მიზეზად, კომპანიების მხრიდან თავის დაზღვევის სურვილი სახელდება. არათანაბარი კონკურედნტული გარემო კი კერძო ლაბორატორიების ბაზრის დასუსრტებას გამოიწვევს. სწორედ ამიტომ ხელისუფლებაში "ღვინის ლაბორატორიის" გასხვისებაზე ალაპარაკდნენ.
2003 წლის 26 დეკემბერს, ღვინის ხარისხის სისტემის ჩამოყალიბებისა და განვითარების ხელშემწყობი ფონდი დაფუძნდა, რომლის ერთ-ერთი დამფუძნებელიც "სამტრესტია", ხოლო ფონდის მიერ 2006 წლის 13 აპრილს შპს "ღვინის ლაბორატორია" შეიქმნა. ლაბორატორიის აღჭურვა და პერსონალის ტრეინინგი GTZ-ის დახმარების ფარგლებში განხორციელდა. აღნიშნული ლაბორატორიის ჩამოყალიბებამ შესაძლებელი გახადა ღვინისა და სხვა ალკოჰოლური სასმელების ხარისხის ტესტირების თანამედროვე მეთოდების დანერგვა, რამაც ღვინის ხარისხის გაუმჯობესებაზე მნიშვნელოვანი გავლენა იქონია.
ხელისუფლებაში აცხადებენ, რომ "სამტრესტის" ფუნქციებიდან გამომდინარე, მისი თანამომაწილეობა ფონდში, რომელიც არის შპს "ღვინის ლაბორატორიის" დამფუძნებელი, ხელს უშლის "სამტრესტს" სრულფასოვნად და მიუკერძოებლად გაატაროს სახელმწიფო პოლიტიკა ამ სფეროში და გადაჭრას დებულებით განსაზღვრული ამოცანები, რადგან „სამტრესტი" ვალდებულია განახორციელოს კონტროლი ალკოჰოლური პროდუქციის ხარისხზე და, მათ შორის, გააკონტროლოს ლაბორატორიების (ასევე შპს "ღვინის ლაბორატორიის", რომლის თანამფლობელიც თვითონ არის) მიერ გაცემული გამოცდის ოქმების სისწორე.
