მიგრაციის საკითხთა სამოქალაქო კოალიციის წევრები პარლამენტის თავმჯდომარის მოადგილე ანზორ ბოლქვაძესთან შეხვედრისას ეკომიგრანტებთან დაკავშირებით კანონმდებლობაში ცვლილებების შეტანის ინიციატივით გამოვიდნენ.
მათი განცხადებით, ბოლო წლებში საქართველოს მთავრობის მცდელობის მიუხედავად, რომ საცხოვრებელი სახლებით დააკმაყოფილოს სტიქიის შედეგად დაზარალებული მოქალაქეები, მათ ირგვლივ არსებული საკანონმდებლო ვაკუუმი ხელ-ფეხს უკრავს როგორც სახელმწიფოს, ასევე დონორ საერთაშორისო ორგანიზაციებს და უშუალოდ ეკომიგრანტებს.
ომისა და მშვიდობის გაშუქების ინსტიტუტის წარმომადგენლის, გიორგი კუპატაძის თქმით, გაეროს სახელმძღვანელო პრინციპებით, დევნილს წარმოადგენს პირი, რომელიც ომის, ადამიანის უფლებების მასობრივად დარღვევის ან სტიქიური უბედურების შედეგად იძულებული იყო დაეტოვებინა საკუთარი სახლ-კარი. საქართველოს კანონით "იძულებით გადაადგილებულ პირთა - დევნილთა შესახებ" ეკომიგრანტებს ეს სტატუსი მინიჭებული არა აქვთ.
კოალიციის წევრთა თქმით, კანონმდებლობაში ცვლილების შეტანისა და ეკომიგრანტების საკითხთან დაკავშირებით, ერთიანი სახელმწიფო სტრატეგიის შემუშავების შემთხვევაში, შესაძლებელი გახდება ეკომიგრანტების განსახლებისთვის საერთაშორისო ორგანიზაციებიდან დაფინანსების მოპოვება.
ბოლქვაძის განცხადებით, ეკომიგრანტებისთვის ღირსეული საცხოვრებელი პირობების შექმნა უაღრესად მნიშვნელოვანია და უკანასკნელი რამდენიმე წლის განმავლობაში ხელისუფლებამ ათეულობით ოჯახს გადასცა საცხოვრებელი სახლები სამხრეთ საქართველოსა და კახეთში.
"ამ ეტაპზე გპირდებით, რომ გავივლით საჭირო კონსულტაციებს და ვიმოქმედებთ ისე, როგორც ეკომიგრანტებისთვის იქნება უმჯობესი", - განაცხადა ბოლქვაძემ.
საკითხის განხილვას ესწრებოდნენ ის მაჟორიტარი დეპუტატებიც, რომელთა მუნიციპალიტეტებშიც ეკომიგრანტების პრობლემა მწვავედ დგას. მიგრაციის საკითხთა სამოქალაქო კოალიცია შვიდი არასამთავრობო ორგანიზაციისგან შედგება.
