ათდღიანი გაჩერების შემდეგ ენგურჰესი ექსპლუატაციაში შევიდა და მუშაობას ჩვეულ რეჟიმში აგრძელებს. როგორც დღეს მთავრობის სხდომაზე პრემიერ- მინისტრმა ნიკა გიალურმა განაცხადა, სარეაბილიტაციო სამუშაოების გამო ენგურჰესი 10 დღის განმავლობაში გათიშული იყო, თუმცა ამ ხნის განმავლობაში ქვეყანა მაინც ახერხებდა ქვეყნის სრულ მომარაგებასა და ელექტროენერგიის ექსპორტირებას.
"ენგურჰესი 10 დღის განმავლობაში იყო გაჩერებული. მიუხედავად ამისა, პრობელმა არ შეგვქმნია და უფრო მეტიც, ექსპორტსაც ვაწარმოებდით. ენგურჰესი ამ დროისათვის მთავარ სისტემაზეა მიერთებული და პრობლემა აღმოფხვრილია' - განაცხადა პრემიერ-მინისტრმა.
ენერგეტიკის მინისტრი აცხადებს, რომ იმ პერიოდში, როდესაც ენგურჰესი იყო გათიშული ქვეყნის ტერიტორიაზე არსებული ოთხივე თბოელექტროსადგური იყო ჩართული და დეფიციტი არ წარმოქმნილა.
"ენგურჰესზე წყალსადენი საკეტის რემონტი მიმდინარეობდა. მიუხედავად ამისა, ეს იყო პირველი შემთხვევა საქართველოს ისტორიაში, როდესაც გათიშული ენგურჰესის მიუხედავად საქართველო ელექტროენერგიის ექსორტს მაინც ახორციელებდა და შიდა ბაზარზეც შეზღუდვები არ ყოფილა", - განაცხადა ხეთაგურმა.
ხეთაგური ამბობს, რომ ენგურჰესი ამ დროისათვის 345 მეგავატ ელექტროენერგიას გამოიმუშავებს. მინისტრი აცხადებს, რომ ქვეყანა უკვე გადადის ზაფხულის რეჟიმზე, რაც იმას ნიშნავს რომ შიდა ბაზარზე მოხმარება შემცირდება და ქვეყანას საშუალება მიეცემა ელეტქროენერგიის ექსპორტი გაზარდოს.
