2010 წლის წლიური მთლიანი შიდა პროდუქტის რეალურმა ზრდამ წინა წლის მიმართ 6.4 პროცენტი შეადგინა. ხოლო დეფლატორის ზრდა 8.7 პროცენტის დონეზე დაფიქსირდა. "საქსტატის" ინფორმაციით, ამავე პერიოდში მთლიანი შიდა პროდუქტის მაჩვენებელმა მიმდინარე ფასებში 20 791.3 მლნ. ლარი შეადგინა, რაც 15.6 პროცენტით მეტია წინა წლის ანალოგიურ მაჩვენებელზე.
როგორც „ჯი-ეიჩ-ენს" საქსტატიდან აცნობეს, მთლიანი შიდა პროდუქტის მოცულობამ ერთ სულ მოსახლეზე 2010 წელს 4 686.5 ლარი შეადგინა, ხოლო აშშ დოლარებში _ 2 629.0, რაც 173.8 აშშ დოლარით მეტია წინა წლის ანალოგიურ მაჩვენებელზე.
მთლიანი შიდა პროდუქტის დარგობრივ სტრუქტურაში ყველაზე დიდი წილით გამოირჩევა მრეწველობისა (16.9 პროცენტი) და ვაჭრობის (16.6 პროცენტი) დარგები, შემდგომ პოზიციებს იკავებს სახელმწიფო მმართველობა (13.0 პროცენტი), ტრანსპორტი და კავშირგაბმულობა (11.6 პროცენტი), სოფლის მეურნეობა, მეთევზეობა (8.4 პროცენტი).
"საქსტატის" ინფორმაციით, ორნიშნა ზრდა აღინიშნა შემდეგ დარგებში: დამამუშავებელი მრეწველობა (20.3 პროცენტი), საფინანსო შუამავლობა (14.7 პროცენტი), ვაჭრობა (14.1 პროცენტი), ტრანსპორტი (13.1 პროცენტი), სასტუმროები და რესტორნები (12.9 პროცენტი), სხვა კომუნალური, სოციალური და პერსონალური მომსახურების გაწევა (10.4 პროცენტი).
"საქსტატში" აცხადებენ, რომ ზრდა დაფიქსირდა შემდეგ დარგებში: ოპერაციები უძრავი ქონებით, იჯარა და მომხმარებლისათვის მომსახურების გაწევა (8.6 პროცენტი), მშენებლობა (7.6 პროცენტი), კავშირგაბმულობა (6.5 პროცენტი), სამთომოპოვებითი მრეწველობა (4.7 პროცენტი), ჯანმრთელობის დაცვა და სოციალური დახმარება (3.1 პროცენტი), განათლება (2.3 პროცენტი), ელექტროენერგიის, ბუნებრივი აირისა და წყლის წარმოება და განაწილება (2.1 პროცენტი).
მცირე კლება დაფიქსირდა შემდეგ დარგებში: შინამეურნეობების მიერ პროდუქციის გადამუშავება (3.7 პროცენტი), სოფლის მეურნეობა, მეტყევეობა, თევზჭერა (1.7 პროცენტი).