"საქსტატის" ინფორმაციით, 2010 წლის IV კვარტალში მთლიანი შიდა პროდუქტის რეალური ზრდა წინა წლის შესაბამისი კვარტალის მიმართ 6 პროცენტის დონეზე დაფიქსირდა, ხოლო დეფლატორის ზრდამ 11 პროცენტი შეადგინა.
როგორც „ჯი-ეიჩ-ენს" საქსტატიდან აცნობეს, ამავე პერიოდში მთლიანი შიდა პროდუქტის მაჩვენებელმა მიმდინარე ფასებში 6 058.2 მლნ. ლარი შეადგინა, რაც 17.6 პროცენტით მეტია წინა წლის ანალოგიურ მაჩვენებელზე.
სტატისტიკის ეროვნულ სამსახურში აცხადებენ, რომ მთლიანი შიდა პროდუქტის მოცულობამ ერთ სულ მოსახლეზე 2010 წლის მეოთხე კვარტალში 1 365.6 ლარი შეადგინა. მთლიანი შიდა პროდუქტის დარგობრივ სტრუქტურაში ყველაზე დიდი წილით გამოირჩევა ვაჭრობისა (19.1 პროცენტი) და მრეწველობის (17.1 პროცენტი) დარგები, შემდგომ პოზიციებს იკავებს სახელმწიფო მმართველობა (13.2 პროცენტი), ტრანსპორტი და კავშირგაბმულობა (10.4 პროცენტი) და სოფლის მეურნეობა, მეთევზეობა (8.5 პროცენტი).
ორნიშნა ზრდა აღინიშნა შემდეგ დარგებში: საფინანსო შუამავლობა (31.5 პროცენტი), დამამუშავებელი მრეწველობა (24.2 პროცენტი), ვაჭრობა (19.5 პროცენტი), სასტუმროები და რესტორნები (15.6 პროცენტი), ოპერაციები უძრავი ქონებით, იჯარა და მომხმარებლისათვის მომსახურების გაწევა (11.1 პროცენტი) და კავშირგაბმულობა (10.8 პროცენტი).
"საქსტატის" ინფორმაციით, ზრდა დაფიქსირდა შემდეგ დარგებში: სატრანსპორტო მომსახურება (8.8 პროცენტი), მშენებლობა (7.7 პროცენტი), სხვა კომუნალური, სოციალური და პერსონალური მომსახურების გაწევა (5.5 პროცენტი), სამთომოპოვებითი მრეწველობა (5.1 პროცენტი), განათლება (3.3 პროცენტი), ჯანმრთელობის დაცვა და სოციალური დახმარება, (2.0 პროცენტი).
კლება დაფიქსირდა შემდეგ დარგებში: ელექტროენერგიის, ბუნებრივი აირისა და წყლის წარმოება და განაწილება (7.4 პროცენტი), შინამეურნეობების მიერ პროდუქციის გადამუშავება (6.4 პროცენტი), სოფლის მეურნეობა, მეტყევეობა, თევზჭერა (5.3 პროცენტი).