საქართველოში შემოსული პირდაპირი უცხოური ინვესტიციები მეოთხე კვარტალში 25%-ით შემცირდა წინა კვარტალთან შედარებით, ხოლო 2010 წელს სულ შემოსული პირდაპირი უცხოური ინვესტიციები 533 მლნ აშშ დოლარს გაუტოლდა (რაც 16%-ით ნაკლებია გასული წლის ანალოგიურ პერიოდთან შედარებით). ასეთ პროგნოზს აკეთებს "ბი ჯი კაპიტალი".
ამავე კომპანიის ინფორმაციით, პირდაპირი უცხოური ინვესტიციების 35% ტრანსპორტისა და კავშირგაბმულობის სექტორზე მოდის, ხოლო მრეწველობასა და ფინანსურ სექტორში თითოეულში დაახლოებით 90 მლნ აშშ დოლარის ოდენობის ინვესტიციები განხორციელდა. ჰოლანდია წარმოადგენს წამყვან ინვესტორ ქვეყანას 143 მლნ აშშ დოლარით. აღსანიშნავია, რომ პრივატიზაციებში განხორციელებული პირდაპირი უცხოური ინვესტიციები წინა წელთან შედარებით განახევრდა და 49 მლნ აშშ დოლარს გაუტოლდა.
"2010 წლის პირდაპირი უცხოური ინვესტიციების წინასწარი მაჩვენებლები მნიშვნელოვნად ემთხვევა ჩვენს პროგნოზს, თუმცა გაცილებით ნაკლებია მთავრობის ბოლო პროგნოზზე, რომელიც 770 მლნ აშშ დოლარს შეადგენს. მიუხედავად გაუმჯობესებული მაკროეკონომიკური მდგომარეობისა, პირდაპირმა უცხოურმა ინვესტიციებმა დაიკლო, რაც გარკვეულწილად შეიძლება აიხსნას მზარდი გეოპოლიტიკური რისკებით. ქვეყანაში გატარებული წარმეტებული რეფორმებისა და პოზიტიური მაკროეკონომიკური პროგნოზის გათვალისწინებით, ჩვენ ვვარაუდობთ, რომ მიმდინარე წელს პირდაპირი უცხოური ინვესტიციები 700-800 მლნ აშშ დოლარს გაუტოლდება", - აცხადებს ანალიტიკოსი გიორგი ირემაშვილი.
