ეკონომიკისა და მდგრადი განვითარების სამინისტრომ ე. წ. არამიანცის კომპლექსში შემავალი 3 საავადმყოფო გაასხვისა.

საპრივატიზაციოდ გამოტანილ "კარდიოლოგიური კლინიკას", "აკ. ვ. ივერიელის სახელობის ენდოკრინოლოგია - მეტაბიოლოგია-დიეტოლოგიის ცენტრ, შპს "ენმედიცისა" და "პირველი კლინიკური შ.პ.ს" ახალი მფლობელები უკვე გამოუჩნდა.
ეკონომიკისა და მდგრადი განვითარების სამინისტროს ინფორმაციით, "კარდიოლოგიური კლინიკა" 530 ათას ლარად გაიყიდა, მაშინ როდესაც მისი საწყისი ღირებულება 120 ათასი ლარი იყო. სამინისტროს ინფორმაციით, აღნიშნული ობიექტის მფლობელი "შპს კარდიოლოგიური კლინიკა "გული" გახდა.
რაც შეეხება "აკ. ვ. ივერიელის სახელობის ენდოკრინოლოგია - მეტაბიოლოგია-დიეტოლოგიის ცენტრის, შპს "ენმედიცის" მფლობელი უკვე ფიზიკური პირი კობა ბურნაძეა, რომელმაც ობიექტში 390 ათასი ლარი გადაიხადა. აღსანიშნავია, რომ ობიექტის ღირებულება 380 ათას ლარით იყო განსაზღვრული.

შპს "პირველი კლინიკური შ.პ.ს" სახელმწიფო საკუთრებაში არსებული 100% წილი მფლობელი შპს. "შპს რეანიმაცია" გახდა, რომელმაც კლინიკა 590 ათას ლარად შეიძინა. ობიექტის საწყისი ფასი კი 570 ათას ლარად იყო განსაზღვრული.
შეგახსენებთ, რომ ეკონომიკისა და მდგრადი განვითარების სამინისტრომ, ე. წ. არამიანცის კომპლექსში შემავალი 13 საავადმყოფო გაასხვისა, საიდანაც ექვსი კლინიკის მფლობელი დანიელ გუფთა უკვე გახდა.
ეკონომიკისა და მდგრადი განვითარების სამინისტროში განმარტავენ, რომ დანიელ გუფთა კომპანია "ამტელ-პროპერტიეს" ერთ-ერთი დირექტორია. სამინისტროს ინფორმაციით, აღნიშნული კომპანია ახორციელებს საინვესტიციო საქმიანობას ისეთი ქვეყნების უძრავ ქონებაში, როგორიცაა: სინგაპური, ინდოეთი, გაერთიანებული სამეფო, დამოუკიდებელ სახელმწიფოთა თანამეგობრობის ქვეყნები და საქართველო.
გუფთამ ეკონომიკისა და მდგრადი განვითარების სამინისტროსგან 330 ათას ლარად "ზოგადი თერაპიის კლინიკა", 740 ათას ლარად შპს "ძმები ზუბალაშვილების სახელობის პედიატრიული კლინიკა", 500 ათას ლარად შპს "თვალის სნეულებათა კლინიკა მზერა", 720 ათას ლარად "გინეკოლოგიური კლინიკა", 55 ათას ლარად "ანესთეზიოლოგიური კლინიკა" და 2 მლნ. 100 ათას ლარად "თორაკო-აბდომინალური კლინიკის" მფლობელიც გახდა.