აფხაზეთის დე-ფაქტო საგარეო საქმეთა მინისტრი მაქსიმ ღვინჯია ლათინურ ამერიკას სტუმრობს.
ვიზიტის ფარგლებში ის ვენესუელის პირველ პირებს შეხვდა, რომლებმაც, ღვინჯიას მტკიცებით, მას აეროპორტში "ძალიან კარგი შეხვედრა მოუწყვეს".
როგორც ღვინჯიამ გამომცემლობა " Eurasianet "-თან საუბრის განაცხადა, ლათინური ამერიკა მთელს მსოფლიოში დიპლომატიური და სავაჭრო კავშირების დამყარების პროცესში, აფხაზეთისთვის საკვანძო მნიშვნელობისაა.
"უფრო მეტი ქვეყნის მიერ აფხაზეთის დამოუკიდებლობის აღიარება, აფხაზი დიპლომატების მთავარი პრიორიტეტია და ლათინური ამერიკა ამისთვის დიდ პოტენციალს შეიცავს. ჩვენ არ გვაღელვებს ის, რომ ჩავესის წინააღმდეგობრივი რეპუტაცია აფხაზეთის დიპლომატიურ ძალისხმევას ხელს შეუშლის. ჩემი წარმოდგენა ვენესუელასა და მის მთავრობაზე ძალიან შეიცვალა მას შემდეგ, რაც მე აქ ჩამოვედი. საერთაშორისო მედიას შეუძლია მეფე იდიოტად აქციოს და იდიოტი მეფედ. პრეზიდენტ ჩავესთან პირველივე კონტაქტი მაფიქრებინებს, რომ ის ძალიან ჭკვიანი, განათლებული და თანამედროვე კაცია", - განმარტა ღვინჯიამ და აქვე დააკონკრეტა, რომ ისინი "აფხაზეთის დამოუკიდებლობის აღიარებას ვენესუელას შემდეგ უკვე მისი ორი მოკავშირე ქვეყნისგან - ბოლივიასა და ეკვადორისგან" ელოდებიან.
მისივე თქმით, აღიარების მოპოვება აფხაზეთისთვის ერთადერთი დიპლომატიური მიზანი როდია.
"არსებობენ აღიარებული ქვეყნები, რომლებიც რეალობაში ქვეყნებიც კი არ არიან, მაგალითად ავღანეთი და სომალი. ჩვენთვის უფრო მნიშვნელოვანი აფხაზეთში ცხოვრების დონის გაუმჯობესებაა. ჩვენ ვენესუელას აღიარებას მხოლოდ აღიარებისთვის როდი ვიყენებეთ, ჩვენ ნამდვილ სავაჭრო ურთიერთობებში ვართ დანტერესებულები. აფხაზეთი დაინტერესებულია ყავის, სიგარების, რომის, ბიტუმენის (ის პროდუქტი, რომელიც ასფალტის წარმოებისთვისაა საჭირო) იმპორტით ლათინური ამერიკიდან - ამბობს ღვინჯია.
ამასთან, მაქსიმ ღვინჯიას შეფასებით, "დამოუკიდებლობის აღიარების" პროცესი იმის გამო ჭიანურდება, რომ "მსოფლიოში არსებული ანტირუსული განწყობილებების პრიზმაში განიხილება".
"აფხაზეთს რუსეთის მარიონეტად აღიქვამენ. ჩვენ რომ უფრო მეტად ვიყოთ ორიენტირებულები შეერთებულ შტატებზე და ევროპაზე, განწყობა სხვანაირი იქნებოდა. ზოგიერთი პრეზიდენტი პირდაპირ გვეუბნება - არ შეგვიძლია თქვენი აღიარება იმიტომ, რომ აშშ-ს საელჩოდან მივიღეთ შეტყობინება რომ ეს არ გავაკეთოთ. ამიტომ ჩვენ ვეძებთ ქვეყნებს, რომლებიც ნაკლებად არიან დაკავშირებულები ასეთ საერთაშორისო პოლიტიკასთან. დსთ-ს ქვეყნებმა, მათ შორის ცენტრალურმა აზიამაც გამოხატა აფხაზეთის აღიარებისადმი ინტერესი, მაგრამ არ უნდათ რომ პირველები იყვნენ ამ საქმეში. ისინი გვეუბნებიან, კარგი გაღიარებთ, მაგრამ ბელორუსიისა და უკრაინის შემდეგო", - ამტკიცებს ღვინჯია.
აღსანიშნავია, რომ ვენესუელადან ღვინჯია მოგზაურობას ეკვადორსა და ბოლივიაში განაგრძობს და როგორც თავად აცხადებს, ეკვადორში ყვავილების მოყვანის ინდუსტრიაში თანამშრომლობაზე მოლაპარაკებების გამართვას აპირებს.
"ჩვენ იმედი გვაქვს, რომ მერე ამ ყვავილებს სამხრეთ რუსეთის ბაზარზე გავყიდით. ჰოლანდიელები არასდროს მოგვყიდიან თავის ტექნოლოგიებს, ეკვადორი კი მოგვყიდის. მართალია, რომ აფხაზეთს მცირე საექსპორტო რესურსი აქვს, მაგრამ ვფიქრობთ, რომ ღვინო ყველაზე მეტად გამოდგება უცხოეთში გასატანად. მეტიც, ექსპორტის ნაცვლად შესაძლოა სხვა ქვეყნებს რუსული ბაზრებისკენ მოხერხებული და მომგებიანი გზა შევთავაზოთY_ აფხაზეთის პორტი არაა დატვირთული და რუსეთთან მას შეღავათიანი საბაჟო შეთანხმება აქვს, რაც სხვა ქვეყნებისთვის აფხაზეთიდან რუსეთში საქონლის შეტანას უფრო იაფს ხდის, ვიდრე პირდაპირ რუსეთში. რეექსპორტი ჩვენი ეკონომიკის ერთ-ერთი ბურჯია და ჩვენ მისი განვითარება გვჭირდება", - განმარტავს აფხაზეთის დე-ფაქტო საგარეო საქმეთა მინისტრი და აქვე დასძენს, რომ "ლათინური ამერიკის ქვეყნებს შეუძლიათ აფხაზეთი სამხრეთ რუსეთთან, უკრაინასთან და ბელორუსიასთან სავაჭროდ გამოიყენონ".
