უკრაინამ 17 ნოემბერს ყირიმის ხიდზე განხორციელებული იერიშის დროს არა Starlink-ისა და Starshield-ის საკომუნიკაციო ქსელები, არამედ საკუთარი სატელიტური სისტემა გამოიყენა. ამის შესახებ The Times უკრაინულ წყაროებზე დაყრდნობით წერს.
The Times-ის ცნობით, ოპერაციის დაგეგმვაში მონაწილე უკრაინელმა ოფიცერმა გამოცემას განუცხადა, რომ ხიდზე დარტყმით უკრაინამ აჩვენა, რომ საბრძოლო ოპერაციების ჩასატარებლად უკვე აღარ არის დამოკიდებული Starlink-ისა და Starshield-ის ქსელებზე.
„ისტორიაში პირველად, ჩვენ ყველა ეს დრონი გამოვიყენეთ რაკეტებისთვის ვიდეოსიგნალის გადასაცემად, რათა მათ ხიდზე კონკრეტული სამიზნეებისთვის დაერტყათ. ვაჩვენეთ, რომ ასეთი ოპერაციების ჩატარება Starlink-ის გარეშე შეგვიძლია“, - განაცხადა უკრაინელმა ოფიცერმა.
მისივე თქმით, ყირიმის ხიდზე დარტყმა აშშ-ის, რუსეთისა და ჩინეთის ლიდერების შეხვედრის წინ სიმბოლური ჟესტიც იყო, რომლის მიზანი ვლადიმირ პუტინის სისუსტის ჩვენება გახლდათ.
გამოცემის წყაროების ინფორმაციით, ოპერაცია რთული, კომბინირებული სქემით განხორციელდა.
The Times-ის ცნობით, ეს ოპერაცია უკრაინის შესაძლებლობების დემონსტრირებას ისახავდა მიზნად, მათ შორის იმის ჩვენებას, რომ ქვეყანას შეუძლია მოწინააღმდეგის სტრატეგიულ ობიექტებზე დარტყმები დასავლურ სატელიტურ საკომუნიკაციო ქსელებზე დამოკიდებულების გარეშე განახორციელოს.
ოპერაციაში მონაწილეობდნენ სარაკეტო ძალები, მე-7 ღრმა დარტყმების ცენტრის ელიტური უპილოტო სისტემების ოპერატორები, რომლებიც „მადიარის ჩიტების“ სახელით არიან ცნობილი, სპეციალური დანიშნულების უპილოტო სისტემების პირველი ცალკეული ბრიგადა, უკრაინის უსაფრთხოების სამსახური, უკრაინის სამხედრო-საზღვაო ძალები და სპეციალური ოპერაციების ძალების ქვედანაყოფები.