უკრაინის ომბუდსმენი დმიტრო ლუბინეცი დელეგაციასთან ერთად ხუთშაბათს ხერსონის ოლქის დროებით ოკუპირებული ქალაქ ოლეშკიში ჰუმანიტარული მისიის განხორციელების ადგილზე გაემგზავრა.
ინფორმაციას უკრაინის რადას ფრაქცია „ხალხის მსახურის“ ხელმძღვანელი დავით არახამია სოციალურ ქსელში წერს.
„ომბუდსმენ დმიტრო ლუბინეცის ხელმძღვანელობით უკრაინის დელეგაცია დღეს ოლეშკის მიმართულებით გაემგზავრა.
ოპერაციის მიმდინარეობას დავაკვირდებით და ინფორმაციას მოგაწვდით, როგორც კი კავშირი გვექნება“, - წერს არახამია.
ინფორმაცია თავად ლუბინეცმაც დაადასტურა.
რუსეთის პრეზიდენტის პრესმდივანმა დმიტრი პესკოვმა განაცხადა, რომ რუსეთი იმედოვნებს, ოლეშკის მცხოვრებლები დღეს ან ხვალ ჰუმანიტარულ დახმარებას მიიღებენ, ხოლო მსურველებს ქალაქიდან გასვლის შესაძლებლობა ექნებათ.
დმიტრო ლუბინეცმა ხუთშაბათს განაცხადა, რომ ხერსონის ოლქის ქალაქ ოლეშკიში განაღმვითი სამუშაოები წარმატებით მიმდინარეობს. მისი თქმით, ჰუმანიტარული დახმარების ტვირთი მზადდება, რომლის მიწოდებაც 30 ოქტომბერს იგეგმება.
