ლიეტუვა კალინინგრადის ოლქთან საზღვრის დასაცავად სამხედროების განთავსებას გეგმავს.
ლიეტუვის შინაგან საქმეთა მინისტრმა მარტინას კატელინასმა განაცხადა, რომ კალინინგრადის ოლქთან ქვეყნის საზღვრის დაცვის გაძლიერებაში სამხედროები ჩაერთვებიან. მისი თქმით, გადაწყვეტილება ლატვიის საზღვარზე მომხდარი გუშინდელი ინციდენტის, რეგიონში არსებული უსაფრთხოების ვითარებისა და რუსეთის მიერ მობილიზაციის შესაძლო გამოცხადების შესახებ არსებული სიგნალების ფონზე მიიღეს.
„გუშინდელი ინციდენტის შემდეგ ლატვიის საზღვარზე, რეგიონში უსაფრთხოების საერთო ვითარებისა და იმ სიგნალების შეფასების საფუძველზე, რომ რუსეთმა შესაძლოა მობილიზაცია გამოაცხადოს, დამატებით პრევენციულ ზომებს ვიღებთ.
მივმართე ეროვნული თავდაცვის მინისტრ რობერტას კაუნასს, რომ ლიეტუვის შეიარაღებული ძალები კალინინგრადის ოლქთან საზღვრის დაცვისას სასაზღვრო სამსახურს დაეხმარონ.
მინდა, მკაფიოდ ვთქვა - ლიეტუვის საზღვარზე ამჟამად ვითარება მშვიდია და პანიკის საფუძველი არ არსებობს. სამხედროების გამოყენება პრევენციული ზომაა, რათა მზად ვიყოთ და მსგავსი ინციდენტები თავიდან ავიცილოთ.
ჩვენი საზღვარი დაცულია. რეგიონში ვითარებას ვაკვირდებით. ლიეტუვა მზად არის,“ - წერს მინისტრი.
ცნობისათვის, ლატვია-ბელარუსის საზღვარზე სულ მცირე 20 არალეგალური მიგრანტის ჯგუფმა საზღვრის გადაკვეთა სცადა. მათ თან ახლდნენ ნიღბიანი და შეიარაღებული პირები, რომლებიც ლატვიელ სამხედროებს დაემუქრნენ და მიგრანტებს ლატვიის მიმართულებით გადაადგილებას აიძულებდნენ. მოგვიანებით ნიღბიანი პირები ლატვიის ტერიტორიაზეც შევიდნენ, დააზიანეს ელექტროგამანაწილებელი ფარი და სათვალთვალო კამერები მოიპარეს.
