უკრაინის პრეზიდენტმა ვოლოდიმირ ზელენსკიმ განაცხადა, რომ ბულგარეთის ტერიტორიულ წყლებში რუსეთმა ორ სამოქალაქო გემზე თავდასხმა განახორციელა. მისი თქმით, ერთ-ერთი გემი ჩაიძირა, მეორე კი მნიშვნელოვნად დაზიანდა.
„დღეს ღამით ბულგარეთის წყლებში ორ სამოქალაქო გემზე თავდასხმა განხორციელდა, ერთი მათგანი ჩაიძირა, მეორე კი მნიშვნელოვნად დაზიანდა“, - განაცხადა ზელენსკიმ.
მისივე თქმით, უკრაინის თავდაცვის ძალებს ამ რაიონში სამხედრო ოპერაცია არ განუხორციელებიათ.
„ვუსამძიმრებთ ყველას, ვინც დაზარალდა. უკრაინის თავდაცვის ძალებს ამ რაიონში ზღვაზე არანაირი ოპერაცია არ ჩაუტარებიათ. სამოქალაქო გემებთან დაკავშირებული ეს მორიგი ტრაგედია რუსეთის მცდელობების გაგრძელებაა, დასავლეთ შავი ზღვის ნაწილი ნაოსნობისთვის სრულიად გამოუსადეგარ ზონად აქციოს“, - აღნიშნა უკრაინის პრეზიდენტმა.
ზელენსკის განცხადებით, უკრაინულმა მხარემ მომხდარის შესახებ ინფორმაცია ბულგარეთის ხელისუფლებასთან გადაამოწმა.
„ჩვენი სამხედრო-საზღვაო ძალები ბულგარელ კოლეგებს დაუკავშირდნენ და დადგინდა, რომ ეს იყო რუსეთის მიერ განხორციელებული კომბინირებული თავდასხმა საზღვაო და საჰაერო დრონების გამოყენებით“, - განაცხადა მან.
ზელენსკიმ აღნიშნა, რომ უკრაინის შეიარაღებულ ძალებს, თავდაცვის სამინისტროს, დაზვერვასა და სხვა სამსახურებს დაავალა, პარტნიორებთან მაქსიმალურად სრულად ითანამშრომლონ, რათა ორივე მხარეს თავდაცვის მეტი შესაძლებლობა ჰქონდეს.
ზელენსკიმ ასევე აღნიშნა, რომ წინა დღეს რუმინეთის წყლებში გემზე თავდასხმა განხორციელდა.
„ახლა - ბულგარეთი. რუსები სწორედ ამას გეგმავენ ესკალაციის მუდმივ გაძლიერებას. მათი დრონები მუდმივად შედიან მოლდოვის ტერიტორიაზე და ეს უკვე არ არის პირველი თავდასხმა შავ ზღვაში ჩვენი პარტნიორი ქვეყნების წყლებში მცურავ გემებზე. ამასთან, მუდმივად გრძელდება თავდასხმები ჩვენს პორტებზე. რუსეთის აგრესიას მკაფიო რეაქცია უნდა მოჰყვეს. საჭიროა სრულიად მკაფიო საპასუხო მოქმედებები“, - განაცხადა ზელენსკიმ.
6 ოქტომბერს შავ ზღვაში, ბულგარეთის ექსკლუზიურ ეკონომიკურ ზონაში, დრონებმა ორ სავაჭრო გემზე იერიში მიიტანეს.
ბულგარეთის პრემიერ-მინისტრმა რუმენ რადევმა განაცხადა, რომ თავდასხმის შედეგად ერთ-ერთი გემი ჩაიძირა, ხოლო მისი ეკიპაჟის წევრები დაკარგულად ითვლებიან.
ევროკომისიის პრეზიდენტმა ურსულა ფონ დერ ლაიენმა ბულგარეთის ექსკლუზიურ ეკონომიკურ ზონაში გემებზე დრონებით თავდასხმასთან დაკავშირებით შეშფოთება გამოთქვა.
