სპეციალურ პენიტენციურ სამსახურთან პატიმარ გიორგი დავითაძის ოჯახის წევრები აქციას მართავენ. ადგილზე სიმბოლურად მიიტანეს სამედიცინო ხელთათმანები.
გიორგი დავითაძის მამამ კომენტარი გააკეთა სახალხო დამცველის, ლევან იოსელიანის განცხადებაზე, რომელშიც ის ამბობს, რომ „კადრებში რაც ნახა, არ ჩანს, რომ გიორგი დავითაძე თითით გააუპატიურეს“.
ავთანდილ დავითაძის განცხადებით, ლევან იოსელიანი არა ხალხის და წამებული ადამიანის უფლებებს, არამედ „ქართული ოცნების“ უფლებებს იცავს.
მისი თქმით, ლევან იოსელიანი მასზე დაკისრებულ მოვალეობას არ ასრულებს.
"საქართველოში სახალხო დამცველი უკვე აღარ გვყავს! ეს არის ამ ხელისუფლების დამცველი და მგონი ისეა დაშინებული, როგორც გიორგის მოექცნენ, ისე რომ არ მოექცნენ, ამიტომაც ვეღარაფერს ამბობს. ეს კაცია ლევან იოსელიანი, რომელიც არა ხალხის უფლებებს და წამებული ადამიანის უფლებებს იცავს, არამედ „ქართული ოცნების“ უფლებებს იცავს“, - განაცხადა დავითაძემ.
პატიმრის ოჯახის წევრები ციხის ადმინისტრაციის პასუხსიმგებლობის საკითხს აყენებენ და ითხოვენ თანამდებობიდან გადადგეს ციხის უფროსი, შოთა ტრაპაიძე, ძალადობაში მხილებული ბადრაგი, გიორგი კვარაცხელია და ციხეების უფროსი, გიორგი პატარიძე.
გიორგი დავითაძის ოჯახი ასევე ითხოვს, პირდაპირი ეთერი დაუთმოს "საზოგადოებრივმა მაუწყებელმა". ავთანდილ დავითაძემ ცოტა ხნის წინ პენიტენციურთან შეკრებილებს მოუწოდა, რომ მსვლელობით სწორედ საზოგადოებრივი მაუწყებლისკენ დაიძრნენ.
"მე, როგორც მშობელი, მოვითხოვ, პირველ რიგში საზოგადოებრივმა მაუწყებელმა დაგვითმოს ეთერი, რატა სრული სიმართლე მივიტანოთ საზოგადოებამდე. ასევე დაუყოვნებლივ გადაყენებული იქნას თანამდებობიდან გიორგი პატარიძე, ასევე უფლებამოსილება შეუწყდეს ციხის უფროსს, შალვა ტრაპაიძეს და ყველა იმ ბადრაგს, ვინც პირადად ღებულობდა მონაწილეობდა, ჩემი შვილის ღირსების შელახვაში", - აცხადებს ავთანდილ დავითაძე.
