უკრაინის პრეზიდენტმა ვოლოდიმირ ზელენსკიმ განაცხადა, რომ აშშ-ის პრეზიდენტმა დონალდ ტრამპმა საბოლოო გადაწყვეტილება მიიღო უკრაინისთვის Patriot-ის საჰაერო თავდაცვის სისტემებისთვის რაკეტების წარმოების ლიცენზიის გადაცემის შესახებ.

ზელენსკის თქმით, ამის შესახებ ტრამპმა მას ნიუ იორკში, გაეროს გენერალური ასამბლეის ფარგლებში გამართულ შეხვედრაზე განუცხადა.

„არსებობს კონკრეტული შეთანხმებები. პრეზიდენტმა ტრამპმა ბოლო შეხვედრაზე ხაზი გაუსვა: „დიახ, მე საბოლოო გადაწყვეტილება მივიღე - უკრაინა Patriot-ის რაკეტების წარმოების ლიცენზიებს მიიღებს“, - განაცხადა ზელენსკიმ ჟურნალისტებთან.

მანამდე, 22 სექტემბერს, ზელენსკი აცხადებდა, რომ ტრამპი ლიცენზიის გაცემის საკითხის მიმართ „პოზიტიურად“ იყო განწყობილი, თუმცა კონკრეტული გადაწყვეტილება მაშინ არ არსებობდა.

ამასთან, 23 სექტემბერს აშშ-ის სახელმწიფო დეპარტამენტის წარმომადგენელმა იან ბეიტსონმა განაცხადა, რომ ვაშინგტონს ლიცენზიის გაცემაზე საბოლოო გადაწყვეტილება ჯერ არ ჰქონდა მიღებული და საკითხზე მოლაპარაკებები გრძელდებოდა.

ზელენსკის განცხადებით, უკრაინაში Patriot-ის რაკეტების წარმოების დაწყებას შეთანხმების მიღწევის შემთხვევაში შესაძლოა დაახლოებით ერთი წელი ან წელიწად-ნახევარი დასჭირდეს.

24 სექტემბერს ზელენსკიმ ასევე განაცხადა, რომ უკრაინამ Patriot-ის სისტემებისთვის რაკეტების ახალი პარტიის მიწოდებაზე შეთანხმებას მიაღწია, თუმცა არ დააკონკრეტა, რომელ ქვეყანასთან გაფორმდა შეთანხმება.