თეთრმა სახლმა CNN-ის, MS NOW-ისა და Politico-ს ჟურნალისტებსთვის მუშაობის უფლება აღადგინა მას შემდეგ, რაც ფედერალურმა მოსამართლემ დონალდ ტრამპის ადმინისტრაციას მათი წვდომის დაუყოვნებლივ აღდგენა დაავალა. ამის შესახებ Reuters წერს.
აშშ-ის ფედერალურმა მოსამართლემ ტიმოთი კელიმ ოთხშაბათს ღამით გამოცემული განკარგულებით თეთრ სახლს სამი მედიასაშუალების ჟურნალისტებისთვის პრეს-აკრედიტაციების აღდგენა მოსთხოვა. მისი შეფასებით, ჟურნალისტებისთვის წვდომის გაუქმება, სავარაუდოდ, კონსტიტუციით გათვალისწინებულ სათანადო სამართლებრივ პროცედურებს არღვევდა. განკარგულება 14 დღის განმავლობაში მოქმედებს.
ჟურნალისტებს თავდაპირველად, მიუხედავად სასამართლოს გადაწყვეტილებისა, თეთრ სახლში შესვლის უფლება კვლავ არ მისცეს. CNN-მა, MS NOW-მ და Politico-მ ამის გამო სასამართლოს გადაუდებელი მოსმენის ჩატარება სთხოვეს. მოგვიანებით ჟურნალისტებს შენობაში შესვლის შესაძლებლობა მიეცათ.
ტრამპმა CNN-ის, MS NOW-ისა და Politico-ს აკრძალვის შესახებ 18 სექტემბერს განაცხადა და მათ მიერ ადმინისტრაციის გაშუქება „ყალბ ამბებად“ შეაფასა. სამმა მედიასაშუალებამ პრეზიდენტის გადაწყვეტილება სასამართლოში გაასაჩივრა და განაცხადა, რომ აკრძალვა მათი პირველი შესწორებით დაცულ უფლებებს არღვევდა.
თეთრი სახლი კი სასამართლოში ამტკიცებდა, რომ ჟურნალისტებისთვის წვდომის შეზღუდვა ეროვნული უსაფრთხოებისა და პროფესიული სტანდარტების დაცვის აუცილებლობით იყო განპირობებული. მოსამართლე კელი ამ არგუმენტის მიმართ სკეპტიკურად იყო განწყობილი და აღნიშნა, რომ საქმის მასალებში ვერ ხედავდა საკმარის საფუძველს, რომელიც აკრძალვას ეროვნული უსაფრთხოების მოტივით გაამართლებდა.
