ევროკავშირის საბჭომ უკრაინისთვის თითქმის 3 მილიარდი ევროს ოდენობის მერვე რეგულარული ტრანშის გამოყოფა დაამტკიცა. თანხა უკრაინას Ukraine Facility-ის ფარგლებში გადაეცემა.

ევროკავშირის საბჭოს განცხადებით, დამტკიცებული ტრანში უკრაინის მიერ 10 მიზნობრივი ნაბიჯის წარმატებით შესრულებას უკავშირდება. ამ ეტაპზე უკრაინამ Ukraine Plan-ით გათვალისწინებული 95 ნაბიჯიდან 84 შეასრულა, რაც დაახლოებით 88%-ს შეადგენს.

დამტკიცებული თანხიდან თითქმის 800 მილიონი ევრო პირველად გამოიყოფა უკრაინის მხარდაჭერის სესხის ფარგლებში.

ევროკავშირის განმარტებით, Ukraine Facility-ის დაფინანსება უკრაინის მაკროფინანსური სტაბილურობის გაძლიერებას, ქვეყნის აღდგენასა და მოდერნიზაციას, სახელმწიფო მმართველობის ფუნქციონირების უზრუნველყოფასა და რეფორმების მხარდაჭერას ემსახურება.

ამასთან, ევროკავშირის საბჭომ უკრაინის გეგმაში ნორვეგიის დაახლოებით 92 მილიონი ევროს ოდენობის ნებაყოფლობითი ფინანსური კონტრიბუცია შეიტანა. ეს თანხა უკრაინას არადაბრუნებადი დახმარების სახით გადაეცემა.

ევროკავშირის ინფორმაციით, ნორვეგია პირველი ევროკავშირის არაწევრი ქვეყანაა, რომელიც Ukraine Facility-ის პირველ კომპონენტში - Ukraine Plan-ის მხარდაჭერაში — ფინანსურად მონაწილეობს.

მერვე ტრანშის გამოყოფის შემდეგ, უკრაინის მიერ 2024 წლის შუა პერიოდიდან Ukraine Facility-ის ფარგლებში მიღებული თანხების საერთო მოცულობა 32 მილიარდ ევროს გადააჭარბებს.