უკრაინის პრეზიდენტმა ვოლოდიმირ ზელენსკიმ განაცხადა, რომ მნიშვნელოვანია სერბეთთან კარგი, კეთილმეზობლური ურთიერთობების განვითარება და უკრაინული მხარე დაინტერესებულია ქვეყნის ევროპული ინტეგრაციით.
„ჩვენ ძალიან დაინტერესებული ვართ, რომ სერბეთი უფრო ახლოს იყოს ევროკავშირთან, ვიდრე რუსეთთან . ეს სერიოზული სამუშაოა. რა თქმა უნდა, ეს სერბეთისა და სერბი ხალხის არჩევანია, მაგრამ ჩვენ პარტნიორები უნდა ვიყოთ, რათა რეალურად ვაჩვენოთ კარგი, კეთილმეზობლური ურთიერთობები“, - განაცხადა ზელენსკიმ პარასკევს, ივანო-ფრანკოვსკის ოლქში, „კარპატული რვიანის“ პირველ დამფუძნებელ სამიტზე.
როგორც ცნობილია, „კარპატული რვიანის“ სამიტის ფარგლებში ზელენსკიმ სერბეთის პრეზიდენტ ალექსანდარ ვუჩიჩთან შეხვედრაზე უკრაინისა და სერბეთის ევროპული ინტეგრაცია, რუსეთის მიერ განხორციელებული დარტყმების შედეგად შექმნილი ვითარება და ზელენსკის ბელგრადში ვიზიტის დროს მიღწეული შეთანხმებები განიხილა.
მანამდე ვუჩიჩმა განაცხადა, რომ 2026 წლის პირველ ნახევარში სერბეთსა და უკრაინას შორის სავაჭრო ბრუნვა 42%-ით გაიზარდა.
