რუსეთის მიერ უკრაინაში სრულმასშტაბიანი შეჭრის დაწყებიდან გაერო-მ სექსუალური ძალადობის 1004 შემთხვევა გამოავლინა. შემთხვევების 89% რუსეთის ხელისუფლების წარმომადგენლებს უკავშირდება.

გაერო-ს ადამიანის უფლებათა უმაღლესი კომისრის ოფისის ანგარიშის მიხედვით, სექსუალური ძალადობის მსხვერპლები იყვნენ როგორც მშვიდობიანი მოქალაქეები, ისე სამხედრო ტყვეები. იუწყება უკრაინული მედია.

ანგარიში მოიცავს პერიოდს 2022 წლის 24 თებერვლიდან 2026 წლის 31 ივლისამდე. გაეროს მიერ დადასტურებული შემთხვევების 89% რუსეთის ხელისუფლების წარმომადგენლებს, მათ შორის შეიარაღებული ძალების, სასჯელაღსრულების სამსახურისა და უშიშროების ფედერალური სამსახურის თანამშრომლებს, მიეწერება. დანარჩენი 11% უკრაინის ხელისუფლების წარმომადგენლებს უკავშირდება.

გაერო-ს ანგარიშს საფუძვლად უდევს სექსუალური ძალადობის ასობით მსხვერპლთან ჩატარებული კონფიდენციალური ინტერვიუები, ასევე სასამართლო დოკუმენტები და ოფიციალური ჩანაწერები.

გაერო-ს მონაცემებით, სექსუალური ძალადობის მსხვერპლთა უმეტესობა მამაკაცია, განსაკუთრებით დაკავების ადგილებში. ძალადობის მსხვერპლი ასევე გახდნენ ქალები და ბავშვები, ძირითადად უკრაინის ოკუპირებულ ტერიტორიებზე.

ანგარიშში აღნიშნულია, რომ დოკუმენტირებული შემთხვევები მოიცავს გაუპატიურებას, ჯგუფურ გაუპატიურებას, გაუპატიურების მცდელობას, სექსუალურ ძალადობას, სასქესო ორგანოების დასახიჩრებას, გენიტალიებზე ელექტროშოკის გამოყენებას, გაშიშვლების იძულებას და სექსუალური ხასიათის დამამცირებელ მოპყრობას.

გაუპატიურების ყველაზე ახალგაზრდა დადასტურებული მსხვერპლი ოთხი წლის გოგონა იყო, ყველაზე ხანდაზმული კი - 82 წლის ქალი. გაერო-ს ანგარიშის მიხედვით, ორივე შემთხვევაში სექსუალური ძალადობა რუსეთის ხელისუფლების წარმომადგენლებმა ჩაიდინეს.

სექსუალური ძალადობის მსხვერპლმა ბევრმა კაცმა განაცხადა, რომ მათ სასქესო ორგანოებზე ელექტროშოკს იყენებდნენ.

ელექტროშოკერის საშუალებით სასქესო ორგანოებზე ელექტროშოკის გამოყენება უკრაინელი სამხედრო ტყვეებისა და დაკავებული სამედიცინო პერსონალის მიმართ სექსუალური ძალადობის გავრცელებული ფორმა იყო. ანგარიშის მიხედვით, 155 ადამიანმა (27%) ასეთი ძალადობა სულ მცირე ერთხელ განიცადა.

უკრაინელმა სამხედრო ტყვეებმა გაერო-ს ადამიანის უფლებათა ოფისს უამბეს გაუპატიურების შემთხვევებზე, მათ შორის ხელკეტის, საკნის კარის გასაღებებისა და ნიჩბის ტარის გამოყენებით.

ერთ-ერთმა ქალმა განაცხადა, რომ რუსი სამხედრო ზაპოროჟიეში მის სახლში დასახლდა და ერთი თვის განმავლობაში მას კვირაში რამდენჯერმე აუპატიურებდა. სანაცვლოდ, ჰპირდებოდა, რომ მის დაკავებულ ქმარს უკეთეს პირობებში მოექცეოდნენ.

კიდევ ერთი ქალი ჰყვებოდა, რომ რუსი სამხედრო ხერსონში ძალით შეიჭრა მის სახლში და მას ყოველ ღამე აუპატიურებდა. ის ქალს არაერთხელ ემუქრებოდა ჯგუფური გაუპატიურებით.

კიდევ ერთ შემთხვევაში ქალმა გაიხსენა, რომ 2022 წელს ორი რუსი სამხედრო კიევის ოლქში მის სახლში შეიჭრა. მისი ქმარი მოკლეს, შემდეგ კი ქალი ჯგუფურად გააუპატიურეს. რუსი სამხედროები მას ემუქრებოდნენ, რომ წინააღმდეგობის გაწევის შემთხვევაში ოთხი წლის შვილის თვალწინ მოკლავდნენ.

გაერო-ს ადამიანის უფლებათა ოფისის ანგარიშის თანახმად, უკრაინის წარმომადგენლებისთვის მიკუთვნებული დარღვევების თითქმის ნახევარი სექსუალური ძალადობის მუქარას წარმოადგენდა. დანარჩენი შემთხვევები მოიცავდა იძულებით გაშიშვლებას, სასქესო ორგანოებზე ელექტროშოკის გამოყენებას, ცემას, შიშველ მდგომარეობაში სხეულზე ელექტროშოკის გამოყენებას, ცემას, სექსუალური ხასიათის დამამცირებელ მოპყრობას, ასევე სექსუალური ძალადობის ორ შემთხვევასა და გაუპატიურების ორ მცდელობას.

უკრაინის იმ მშვიდობიანი მოქალაქეების 90%-ზე მეტი, რომლებიც რუსებს უკანონოდ ჰყავდათ დაკავებული, გაერო-ს მონაცემებით, წამების, მათ შორის ცემისა და ელექტროშოკის გამოყენების, მსხვერპლი გახდა. ისინი ასევე ხშირად საუბრობენ საკნებში საკვების, მედიკამენტებისა და სანიტარიული პირობების ნაკლებობაზე.